New Delhi, Risaw:
U nongrah ktien jong ka Israel sha India, u Naor Gilon, u la ai khublei ia u Myntri Rangbahduh ka ri India- u Narendra Modi halor ka jingai jingkyrshan ka India ia ka Israel ha kum kane ka por kaba khim bad ba ka Israel ka don hapdeng ka jingiakhun pyrshah ia ki lehnoh Hamas jong ka Palestine.
Kumta ruh u la ong ba ka Israel ka sngewkmen shi katdei eh namar ka jingieid bad jingkyrshan jong ki paralok kum ka India bad kane kan nang pynkhlaiñ shuh shuh ruh ia ka jingiadei hapdeng jong kine ki arliang ri ha ki por ban wan.
Ha ka jingkren kaba utei u nongialam ka Israel u la pyllait paidbah ha ka rynsan ‘Social Media’ X, u la ai khublei kyrpang ia u Myntri Rangbahduh ka India halor ka jingkyrshan ba pura jong ka India ia ka Israel ha ka jingiakhun thma jong ka pyrshah ia kitei ki lehnoh Hamas jong ka Palestine.
Kane ka jingai khublei jong utei u nongialam ka Israel, ka long ruh ha kane ka por ba dang shen u Modi u la iakren bad u nongialam na Israel- u Benjamin Netanyahu haba iadei bad ka jingkloi jong ka India ban iatrei lang bad ban ai jingkyrshan ia ka Israel ha kiba bun ki liang.
La ong ruh ba wat hapdeng ka thma ba ka Israel ka dang iakhun ha kane ka por, u Myntri Rangbahduh ka Israel- u Benjamin Netanyahu u la phone sha u Modi bad iathuh ia u shaphang kaei kaba jia bad ia ki jinglong- jingman baroh hapoh Israel ha kane ka por.
Kumjuh ruh u Modi u la pyllait ia ka jingkren jong u ha katei hi ka rynsan Social Media ‘X’, ha kaba u la ong ba ki paidbah ka ri India ki ïeng ryngkat bad ki nong Israel ha kum kane ka por ba ka Israel ka don hapdeng ka jingeh.
Utei u nongialam jong ka Israel u la iathuh ruh ha u Modi ba ka Israel ka la duh kumba 900 ngut ki paidbah jongka, ha ka jingleit thombor jong kitei ki lehnoh Hamas. Bad kumta 2,616 ngut pat kiba la ngat bad mynsaw.
Kumjuh ruh la ong ba ki lehnoh Hamas ki la ioh ban rahbor bad set ia kumba 30 ngut ki nong Israel hapoh Gaza bad la ong ruh ba ki lehnoh Hamas ki la ther haduh palat 4,500 tylli ki ‘namding sha Israel bad ki shipai jong ka Israel ruh ki la ioh ban pynhiar kput bad ban leit ther ‘namding ia kumba 1,290 tylli ki jaka treikam bad ki ktem jong kitei ki lehnoh hapoh Gaza Strip.
Ka Israel ka la pyntip ruh ba ki don kumba 130 tam ki shipai jongka kiba la iap hapdeng ka jingiakhun bad kitei ki lehnoh bad kumba 50 tylli ki longiing kiba la shah thombor bad kiba ki khun- ki kti jongki, ki la shah rahbor ha ki lehnoh Hamas.
Kum ka jing pynhiar kput, ka Israel ka la phah haduh 3,00,000 syndon ki shipai jongka hapoh jong kine ki 48 kynta, ba kin leit ban pynhiar kput bad ban iakhun pyrshah ia kitei ki lehnoh.
La ong ba kane ka jingphah shipai ka Israel ha kane ka kynti, ka long kaba bun tam eh nalor jong ka sien ba nyngkong ha u snem 1973 ba ka Israel ka la phah haduh 4,00,000 ngut ki shipai iakhun thma jongka hapdeng ka thma Yom Kippur War.
