Lucknow, Risaw
Ka kynhun Special Task Force jong ki pulit ka Uttar Pradesh ha ka sngi Ba-ar ki la ïoh kem ïa arngut ki briew kiba la kwah hir-hir ban kem da ki pulit ha kaba ïadei bad ki jingjia halor u drok ha Maharashtra katba ki dang pyrshang ban pynkhreh ha ka ban leit sha Nepal.
U Abhishek Bilas Balakwade bad u Bhushan Anil Patil, ki la donkti ha ki jingjia ba ïadei bad ka jingïoh ban kurup ïa u drok uba la kot sha ka T. 300 klur ha Maharashtra, ki la shahkem noh ha ka kynhun STF ha ka jingïatreilang bad ka kynhun Pune Crime Branch jong ki pulit ka Maharashtra.
Kine ki arngut ki briew ki la shahkem na Bahraich kaba don ha ka thaiñ Nagar Kotwali jong ka Barabanki distrik, la ong ka jingthoh ba la pyllait da ka kynhun STF.
U Assistant Commissioner of Police, Crime Branch, Pune, u Sunil Tambe, uba long shi bynta jong ka kynhun ba la pynlong ïa ka jingleit thwet ïa kine ki arngut, hashwa u la leit jngoh ïa ka kynhun STF kaba don ha Lucknow na ka bynta ban batai shai halor ka jingdon jong kine ki snar ba la shah kynnoh donkti ha ka kam beaiñ ha kaba ïadei bad ka jingshah kynnoh donkti jong ki ha ka jingïoh ban kurup ïa u drok MDMA uba 150 kilo ha Maharashtra, ha ryngkat ka jingmaham ba kine ki la pyrshang ban phet rieh sha Nepal.
Kumba la ïathuh ka kynhun STF, la ong ba kine baroh arngut ki la shah thwet bad kwah ban kem da ki pulit ha kaba ïadei bad kiba bun ki kam khaïi drok ha Pune bad Nashik distrik.
Kine ki arngut ki la shah kynnoh ba ki la don bynta ha ka jingïasuhbuit sniew ban ïoh pyllait ïa u snar nongïalam jong ka kynhun khaïi drok ha Maharashtra u Lalit Patil na kti jong ki pulit ha ka 2 tarik, Risaw.
La tip na ka jingpynlong ïa ka jingtohkit ba u Bhushan Anil Patil u la long u para jong u Lalit Patil bad u Abhishek Bilas u la long u nongpynïaid jong ka kynhun khaïi drok jong u Lalit Patil.
Kine baroh arngut kiba la shahkem ki la ïathuh ha ki pulit ba ma ki lem bad u Lalit Patil, ki la treikam ha ka jingpynmih ïa u MDMA naduh u snem 2014 bad phah ïa une u dawai ba la shah khang ban die sha ki kynhun kiba ju don bynta ha ki kam ïalehkmen leh sngewbha.
Ka kynhun jong kine ki runar ka la buh da ki karkhana, kaba nyngkong eh na kine ka dei kaba la buh ha Aurangabad bad hadien kane sa ha Pune bad Nashik na ka bynta ban ïohlad ha ka ban shalan sha kylleng ki jaka ïa ki jait dawai ïa kiba la tip kum ki Ecstasy.
Ïa kine kiba la shah kynnoh hadien ba la dep ban pynlong ïa ka jingtohkit la phah sha ka kynhun ha Pune, la ong ka jingthoh ba la phah da ka kynhun tohkit.
