Ki bor distrik ka West Khasi Hills, Nongstoiñ, hadien katto katne taïew ba la mana ba ym dei shuh ban pynlong ïa ki jingïakob khwai dohkha, ka la pynmih pat sa da kawei ka hukum ha kaba la batai bniah ïa ki kyndon kiba ki nongpynlong ïa ki jingïakob khwai dohkha kin hap ban bud. Ka jingmana ban pynlong ïa kine ki jingïakob ka la long hadien ba iwei i khyllung iba la kha ha shiteng lynti i la khlad noh tang na ka daw jong ka jingdheng kali na ka jingdon ka jingïakob khwai dohkha ha Pamphyrnai ha ka 16 tarik Nailur. Hadien katto katne sngi, la mih sa ka huri-hura ha kawei na ki pung dohkha ha Ri-Bhoi ha kaba uwei na ki nongïashim bynta u la wanrah lypa da ka dohkha kaba la ïap. Kiba kum kine ki jingjia ki pynbitar ïa ki paidbah bad ka sorkar ruh kam banse ban hap mana.
Hynrei tang hadien shi bnai duna jong ka jingjia ha Pamphyrnai, u Deputy Commissioner ka West Khasi Hills u la pynmih sa da ki kyndon bathymmai ban pynïaid beit pynïaid ryntih ïa kine ki jingïakob khwai dohkha. Lehse ka sorkar ka sngewthuh shai ba kan ym lah ban khang ïa kine ki jingïakob. Kin don beit ki ban ïaleh pyrshah. Lah hi ban kem ïa baroh ki nongwan ïashim bynta kiba pynkheiñ hukum? Tangba ki dei ban don da ki kyndon kumba la bthah da u Deputy Commissioner ka West Khasi Hills. Lehse kiwei pat ki distrik ki lah ban shim nuksa na West Khasi Hills bad ban pyntreikam ïa kijuh ki kyndon.
Ka jingïakob khwai dohkha ha kylleng ka la ïaid la bun snem mynta. Kat nang mih ki snem, ki trai pung dohkha ki la nang bun. Kito kiba kham kwah ban kamai, ki pynlong da kine ki tamasa bad ban khring kham bun ki nongwan, ki pynheh ïa ka khusnam kaba kot wat sha ka T. 10 lak ruh. Don kiba leit ïashim bynta namar ki kwah pisa, bad don pat kiba leit namar ki sngewtynnad ban khwai. Don ruh pat kiba long thik kumba ong ka ktien “ha ka biej, ha ka shlur” haduh ba ki wanrah syndon da ka dohkha ba la ïap lypa da ka jingthmu ban pynthame ïa ki nongpynïaid bad ban ïoh rah ïa ka song pisa. Hynrei hakhmat kiba bun ba lang, yn ym lah ban leh shukor bad bunsien hi, ïa ki kam shukor lap beit kumba la ïohi ïa kaei kaba la jia ha Ri-Bhoi ha ki katto katne taïew mynshwa.
Hadien ba u Deputy Commissioner ka West Khasi Hills u la pynmih bun tylli ki kyndon ba hap ban pyndep da ki nongpynïaid ïa ki jingïakob khwai, ngin hap ban ïa khmih la kin dang don ne em ki ban wan shakhmat ban pynlong ïa kine ki jingïakob. Ha ka jinglong briew, ym ju don ba kwah ban shah teh shah khum ha ki kyndon. Tangba ïa kata ngin hap ban buh sharud namar hap ïa pyrkhat ïa ka jingbhalang jong baroh. Ym lah ban pynsyllang bad pynsaja ïa kiwei tang namar ka jingsngewbha jong ki katto katne kumba ngi la ïohi ha Pamphyrnai haduh ba ka la ïalam sha ka jingduh noh ïa ka mynsiem bakordor jong i khyllung.
Namar ba ki dei ki kam khalai, ka sorkar ka dei ban shim khajna na kine ki jingïakob la ka long wat tang katto katne ruh. Lada shim khajna na kiwei ki jait khalai, balei yn pyllait ei ïa ka khajna na kine ki jingïakob kiba ki briew ki pynlut pisa bad por ban shong hangto baroh shi sngi naduh ba dang sdang kynjat shai? Lada lap ba ki nongpynïaid ki pynkheiñ ïa ki kyndon, dei ban buh ruh sa da ka kuna ba kin siew. Ki briew kin khap long phikir tat ynda ka pla tyngka jong ki ka shah ktah.
