New Delhi, Risaw:
Ka kynhun NIA hynnin ka sngi ka la pynlong ïa ka jingleit khynra ha kiba bun ki jaka kiba don ha ki 6 tylli ki jylla ha kaba ïadei bad ka jingjia jong ka jingwanrah ïa ki jingkulmar bad ki jingpynthut ha ka por ba don ka jingleit jngoh jong u Myntri Rangbahduh Narendra Modi sha Bihar ha u snem ba la dep, la ïathuh ki heh ba dei khmih.
Ka kynhun National Investigation Agency (NIA) ka la shimti ban tohkit halor kane ka jingjia ïa kaba la buh jingthoh da ki pulit jong ka Phulwari Sharif kaba don ha Patna ha u Naitung jong u snem 2022 pyrshah ïa ki dkhot jong ka seng Popular Front of India (PFI) halor ka jingïasuhbuit sniew jong ki ban wanrah ïa ki jingkulmar bad ki jingpynthut ha ka por ba leit jngoh u Myntri Rangbahduh sha Bihar, ki la ong.
Kane ka kynhun toh-kit jong ka sorkar kmie ka la pynlong ïa ka jingleit khynra sha Maharashtra, Rajasthan, Madhya Pradesh, Tamil Nadu bad Delhi.
Ka kynhun NIA ka la pynlong ïa ka jingleit khynra ha ka ïingsah jong u Abdul Wahid Shaikh kaba don ha ka thaiñ Vikhroli jong ka Mumbai ha Maharashtra.
U Shaikh u dei uba la shah kynnoh donkti ha ka jingjia pynbthei bom ha u snem 2006 ha ka jaka sangeh rel hynrei ka ïingbishar kaba la bishar ka la pyllait noh ïa u na baroh ki jingshah kynnoh.
Ïa ka jingleit khynra la pynlong ha Tonk, Kota bad Gangapur kaba don ha Rajasthan bad Hauz Kaji, Ballimaran, ha ka nongbah New Delhi.
Ha u bnai Nailur jong u snem 2022, ka sorkar ka la pyntreikam da ka jingkhang bad ka jingpyrkhing pyrshah ïa ka seng PFI halor ka jingdon bynta jong ka ha ki kam pyntriem.
