New Delhi, Risaw:
Ka ïingbishar ha Delhi ha ka sngi Ba-ar ka la nang pynjlan sngi shuh shuh ha kaba ïadei bad ka jingphah set hapoh ki kti jong ka kynhun Enforcement Directorate (ED) ïa u MP jong ka seng Aam Aadmi Party (AAP) u Sanjay Singh haduh ka 13 tarik, Risaw ha kaba ïadei bad ka jingshah kynnoh donkti jong u ha ka jingkamai bymhok ïa ka spah kaba u don kaba la mih na ka jingpyndkoh treikam ha ka tnat Excise.
U Singh u la shahkem ha ka 4 tarik, Risaw na ka jaka sah jong u hadien ka jingpynlong ïa ka jingkhynra kaba shi sngi bad ka jingshah kylli jingkylli da bun kynta kum shi bynta ban tohkit halor ka jingdon jong ka jingshah kynnoh klop tyngka ïa kaba la tohkit da ka kynhun ED bad dawa ban set ïa u na ka bynta ka jingtohkit da 5 sngi hadien ka jingshahkem ha ka taïew ba la dep.
Ha ka sngi ban kut ka jingshah tohkit jong u, une u riewsaiñ pyrthei u la shah ïalam hakhmat u nongbishar jong ka Special Court u MK Nagpal ha Rouse Avenue Courts.
Une u nongbishar bakyrpang u la kyntait ban ai jamin ïa u ha kane ka por namar ba ki mukotduma ba la buh da ka kynhun ED bad CBI ka don jingïadei bad kajong kiwei pat ki nongïalam jong ka seng AAP kiba kynthup ïa u Manish Sisodia bad u Satyendar Jain.
Ka kynhun Enforcement Directorate (ED) ka la dawa san sngi na ka bynta ban set ïa u MP ha Rajya Sabha na ka bynta ban tohkit ha kaba ka ïing bishar ka la ailad ban tohkit lai sngi.
