Jaipur, Risaw:
Hadien ka jingïalang bad ki nongkyrshan ha ka konstitwensi jong u, u Mukesh Goyal u la ïam bad jaw ummat haba ka seng BJP ka la kyntait ban ai tiket ïa u ha ka Lah Sngi U Blei haba la pyllait ïa ka thup kyrteng kaba nyngkong jong ki 41 ngut ki kyrtong ki ban sa ïakhun na ka bynta ka ilekshon Assembly ka ban long ha Rajasthan.
Ïa ki kyrteng jong ki kyrtong ki ban ïakhun ha ka ilekshon la rai khatduh ha ka jingïalang jong ka Central Election Committee (CEC) jong ka seng ha kaba la pynïaid da u President jong ka seng BJP u JP Nadda ha ka 1 tarik, Risaw.
Ka seng BJP ka la pynïakhun ïa u Rajyavardhan Rathore, uba long u MP na Jhotwara, katba kawei pat ka MP ka Diya Kumari ka la shah pynïakhun na Vidhyadhar Nagar.
Ka seng ka la pynïakhun ïa u Baba Balaknath na Tijara bad u Kirodi Lal Meena na Sawai Madhopur. Kumba la ïathuh la ong ba ka Election Commission of India (ECI) ha ka sngi Balang ka la pynkylla ïa ki tarik na ka bynta ban pynlong ïa ka ilekshon Assembly ha Rajasthan na ka 23 tarik, Naiwieng sha ka 25 tarik, Naiwieng.
“Kane ka jingpynkylla ïa ka tarik ban pynlong ïa ka ilekshon ka la long hadien ka jingkyrpad jong kiba bun ki seng saiñ pyrthei bad ki kynhun jong ki riewpaidbah bad kumjuh ruh halor ka jingwanrah ïa kiba bun ki daw kiba ïadei bad ki jingbun jong ki jingïathoh bad ki jingdonkam ha kane ka sngi ha kaba ynda la khmih bniah la tikna ba kin sa duna ki briew kiba leit thep vote ha kane ka sngi,” la ong ka ECI.
Ïa ka ilekshon yn sa pynlong ha ki san tylli ki jylla kiba kynthup ha Chhattisgarh, Madhya Pradesh, Rajasthan, Telangana bad Mizoram hapdeng ka 7 tarik, Naiwieng bad ka 30 tarik, Naiwieng bad ka jingpynbna ïa ki nongjop kan sa long ha ka 3 tarik, Nohprah, la ong ka Election Commission.
