Washington, Risaw:
U Chairman jong ka US House Foreign Affairs Committee ha ka Sngi Balang u la iathuh ba ka Egypt ka la dep maham lypa ia ka jingma kaba ap ia ka Israel naduh lai sngi shuwa ba ki lehnoh Hamas kin leit thombor ia ka Israel, katkum ki jingtip ba ka Egypt ka la ioh lum halor ka jingthmu jong kitei ki lehnoh ban leit thombor bad hiar thma ia ka Israel ha ka por ka bym lah ban tip.
Hynrei u la ong ba ka US kam kwah ban tuklar ia ki kam poh iing jong kiwei pat ki ri, hynrei ka la ïohsngew ia katei ka jingmaham jong ka Egypt naduh shwa ba katei ka kynhun lehnoh kan leit thombor ia ka Israel.
Namar la ong ba ka Israel ka dang don hapdeng ka jingeh kaba khraw bad kaba kam ju ioh mad shuh mynta la 75 snem, ha kaba ki lehnoh Hamas ki la leit ban thombor kynsan ia ka Israel ha ka por ka bym poi pyrkhat hadien ba ka Israel bad ka Palestine ki la dep iakren bad iasoi ban ïasuk bad ban iatrei lang noh kumba long kiwei pat ki ri.
Hynrei, ka US ka la ong ba ka jingioh lad jong ka Hamas ban pynurlong ia katei ka jingthmu ba ka la pyn-ap slem, ka long namar ka jingtlot ki tnat syntiat bad ki tnat iada jong ka Israel.
Ki bor pyniaid ka Israel ki la iathuh ba kumba 1,200 tam ka Israel ka la duh noh tad haduh jong ka miet Sngi Balang bad kumba 2,700 tam kiba mynsaw. Nalor kata, kitei ki lehnoh Hamas ki la leit rung sha ki shnong bad ki thaiñ kiba don marjan bad ki bynta khappud bad ki la leit ban siat iap ia ki paidbah nongshong shnong haduh ha iing- ha iing.
