Shillong, Risaw 12
Ka Tynring SC, Lumdiengjri SC bad ka Umlyngka SC ki la khur ïa ka jingjop ha ka lympung ïalehkai SSA SRGT 3rd Division Football League 2023 ha ka sngi Palei.
Ha ka jingïakhun jong ka Group-D ha SSA Stadium, ka Tynring ka la pynliem noh ïa ka Nongumlong SC da 5-2 kol. Ïa ki kol jong ka Tynring la thep da u Mariabiang Kharmalki ha ka minit kaba 2, kumjuh u Korbar Nongspung (39), Arborlang Nongpluh (48), Bankit-lang Kharkongor (57) bad u Rahbor Synnah (83). Hynrei ka Nongumlong ka la lah ban pynphai kylla ar kol lyngba u Nehlang Kharsohnoh ha ka minit kaba 27 & 54.
Ha ka jingïakhun jong kane ka group kaba la long ha madan MFA, ka Lumdiengjri SC ka la pynliem noh ïa ka Lawmali Pyllun SC da 2-1 kol na ka bynta ban khur ïa ka jingjop kaba nynkong.
Wala ka Lawmali ka la ïoh ban pynkhih jar nyngkong eh tang mar ïasdang ka jingïalehkai lyngba u Banganson Nongphlang ha ka minit kaba 7, hynrei tang hadien shiteng kynta ka la shah pynphai kylla ar kol lyngba u Robin Pnar (32) bad u Nick Roy Syiem (39) na ka bynta ban pynlong ïa ka Lumdiengjri ban khur syndon ïa ka jingjop.
Lyngba kane ka jingjop, ka Tynring ka la bat ïa ka kyrdan ba hakhlieh jong ka Group-D ha kaba ka la kamai 6 point na ki ar sien ïakhun, katba ka Lawmali Pyllun bad ka Lumdiengjri kiba la khur mar 3 point, hynrei ka Rynjah bad ka Nongumlong ki dangdei ki kynhun kiba dangmat ia ka jingshah rem.
Haba phai sha ka jingïakhun jong ka Group-A, ka Umlyngka ka la pynliem noh ïa ka Gorkha Association lyngba ka shi kol ba la thep da u Chesterfield Makroh ha ka minit kaba 75.
Da kane ka jingjop kaba ar ka Umlyngka ka la kamai 6 point na ka bynta ban bat ïa ka kyrdan ba nyngkong. Kiwei pat kiba la buh nadien ki long ka Krang (4 point), Meghalaya Police (3 point), Nongmynsong (1 point), Lapalang bad ka Gorkha Association, kiba dangmad ia ka jingshah rem.
Kane ka lympung kan bteng biang ha ka sngi Thohdieng, ha kaba ka Nongmynsong SC kan ïakhun pyrshah ia ka MLP F.T ha ka por 1:10 mynsngi, ka Pomlakrai SC ia ka Mawryngkneng SC ha ka por 3 baje janmiet, ki ban ïakhun ha SSA Stadium. Katba ha madan MFA ki kynhun ki ban ïakhun kin long ka PFR F.A bad ka Nongkseh SC (1:10PM) bad ka Umpling SC ïa ka Mylliem Lum SC (3PM).
