La ujor ka jingjied CEM u Bah E. Bareh
Ha ka 28 tarik u bnai ba la dep la jied CEM ïa u Bah E. Bareh. Mynta la sngewthuh na ka liang kiba ïa ieng pyrshah(opposition)ki la phah ka ‘Representation’ – ka jingujor pyrshah sha u Lat ban ong ba kata ka jingjied kam long katkum ka aiñ ba ka Rules. Hangne la sngewthuh ba la ong ha kata ka jing-ujor ba u Chairman jong ka District Council u dei ban shu kynting da ka pisa. Kane ka lah ban long tang haba u Chairman u la lah thep ïa la ka vote bad hadien ba u lah thep ka la don ka jingïaryngkat ha ka vote. Haba long kumta u Chairman ha kata ka dur u lah ban shu kynting da ka pisa. Hynrei ban ong ba u Chairman ba um lah ban vote kata te ka bym lah ban long. Ym don ka aiñ ka ban khang ia u briew ban pyndonkam ïa la ka hok ban thep vote kaba la pynkhamti da ka Constitution. Ka Constitution ruh ka da jer ba mano ban bym lah ban thep vote. Sa kawei pat ka jingkylli ka mih ba kumno u Chairman u lah ban tip lypa ba ïa ryngkat ki vote lada um shym la ñiew. Kata ki nong ujor ki mut ba u Chairman u dei ban thep la ka vote hadien ba la ñiew ïa ki vote. Kane ka bym lah long bad ka bym juh iohsngew ha ka pyrthei Democracy (synshar paidbah).
[U NONGSAIÑ HIMA (02 tarik ïaïong,1963)]
