Mumbai, Risaw:
Ka Supreme Court hynnin ka sngi ka la nang pynjlan shuh shuh ha kaba ïadei bad ka jingpyllait jamin ba shipor ïa u heh ka seng Nationalist Congress Party (NCP) bad u Myntri barim jong ka Maharashtra u Nawab Malik da lai bnai ha kaba ïadei bad ka mukotduma jong ka jingshah kynnoh donkti jong u ha ka jingkamai ïa ka spah bymhok namar ba u la dei ban shah sumar.
Hashwa u la ïoh jamin ha ka 11 tarik, Nailar ha kaba ka la kut noh ha kane ka taïew.
U Malik u la shahkem ha ka 23 tarik, Rymphang ha u snem ba la lah halor ka jingshah kynnoh donkti jong u ha ka jingklop tyngka bad u la leit mih sha ka Supreme Court na ka bynta ban pynibor halor ka rai jong ka High Court jong ka Bombay ha ka 13 tarik, Naitung kaba la kyntait ban pyllait jamin ïa u.
Haba la pdiang ïa ka jingkyrpad jong u na ka bynta ka jingbishar bniah ha ka 11 tarik, Nailar, ka ïingbishar bahakhliehduh ka la rai pyllait jamin shipor ïa u namar ba u la don ïa ka jingshitom ha u khyllai.
Ha ka sngi Palei, ka kynhun nongbishar kaba kynthup ïa ka Justice Bela M Trivedi bad u Dipankar Datta ki la pynjlan shuh shuh ka bynta ka jingkyrpad sa kumba lai bnai hadien ba ki la khmih bniah halor ki Medical Report ba dang shen jong u.
Ka kynhun Enforcement Directorate (ED), kaba la mihkhmat da u Additional Solicitor General (ASG) u SV Raju kam shym la pyrshah ei ei ha kaba ïadei bad ka jingnang pynjlan por shuh shuh ha kaba ïadei bad ka jingshah pyllait jamin jong u namar ba u la dei ban shah sumar.
Ka kynhun nongbishar ka la ong, “Ka kynhun kaba dei ban khmih bniah ka la ong ba ma u (Malik) u dang shitom ha u khyllai bad ïa mynta um pat ïoh ïa ka jingkoit. U ASG Raju um shym la pyninia halor kane ka bynta. Ha kaba ïadei bad kane, ïa ka jingpan jamin kaba shipor la pynjlan shuh shuh sa kumba lai bnai.”
