Nongpoh, Risaw 12
Ka Ri Bhoi Water Sports and Tourism Cooperative Society ha ryngkat ka jingïatreilang bad ka tnad Sports & Youth Affairs ka Sorkar Jylla ha ka sngi Palei ka la sdang ïa ka jingïakob king-lieng kaba la tip kum ka ‘Meghalaya Kayak Fest 2023’ ïa kaba la pynlong hapoh ka Wah Umtrew, White Water Village kaba dang hap hapoh ka shnong Umtham, Ri Bhoi District.
Kane ka lympung ka ban neh haduh lai sngi lynter, kata naduh mynta ka sngi ka 12 tarik bad yn pynkut pat ha ka 14 tarik, la wan ïashim bynta da 25 ngut ki nongking-lieng kylleng ka pyrthei, kumjuh la ïoh ban ïashim bynta lang da 8 ngut ki khynnah nong-king-lieng jong katei ka thaiñ Ri Bhoi ha ryngkat ka jingwan ban sakhi lang da ki paidbah.
Kitei ki nongking-lieng kiba la wan nabar ri ki long kum na Sri Lanka, Switzerland, New Zea-land, United Kingdom, United States of America, the Czech Republic, Australia, Norway, Chile, Mexico, Germany bad na France.
Haba ai jingkren ha kane ka sngi, na ka liang ka Kong Larikordor Kharkrang kaba dei kawei na ki dkhot jong ka Ri Bhoi Water Sports and Tourism Cooperative Society ka la ïathuh ba ha kane ka sngi sdang, la pynïakhun shwa ïa ki khynnah rit ha ka kyrdan Intermediate, katba ïa ka kyrdan jong kiba la tbit (Professional) yn pynïakhun ha ki sngi ki ban wan. Ka la pyntip ruh ba ki don kumba lai ngut na ka jylla Meghalaya ki ban iakhun ha katei ka kyrdan Professional bad 8 ngut ha ka kyrdan Intermediate.
Wat la ki la don haduh 25 ngut ki nongwan ïashim bynta na kylleng ki ri ka pyrthei, hynrei na ka liang ka Ri Bhoi Water Sports and Tourism Cooperative Society ka dangdon jingkyrmen bad kin dangdon shuh shuh ki ban dangwan ha kine ki sngi ki ban sa wan ban ïashim bynta ha kane ka lympung ïakop kinglieng kaba heh tam ha ka ri.
Kane ka Megha Kayak Festival ka long ruh ha kajuh ka por kum ka lad ban kyntiew ha ki kam jngohkai namar ka jingitynnad ka mei mariang ha kane ka Jylla.
