Bertina Lyngdoh
Ka ranab : lumdiengiei, ka hima ki jait sim ne ki jait ba don sner baroh, ha kaba kane ka ranab la synshar da u sim syiem ïa uba baroh ki kynja sim kynja doh ki burom ïa ka jingbha jong u, bad ïa ka jingkitkhiah ïa ka shitom ka shijot. Hynrei hangta, napdeng ki sim baroh, la don uwei u sim uba kham sngew meng, sngew biang, sngew batip, sngew bhabriew, uta u dei u sim shadkyrtoh. Une u sim u don ïa ka jinglong ba sarong jong u, bad dei namar kane kiwei ki para sim kim juh kim jan bad u, bad kane ka la pyntharai ïa u shadkyrtoh ba baroh ki shynrain ïa u. Dei lyngba kawei ka jingpynbna kata ka jingpynbna ka sim Shadkylliah ïa u Shadkyrtoh, ba ka hima sima, ki bakhraw ki batri, ki syiem ki patsha kum kawei ki la rai ban pynkup ha u ïa ka nam ka burom ba un leit nguh leit dem ha tyngkong ïing ka sngi na ka bynta ka jingbha jong ka ïa ka pyrthei pyllun baroh kawei kata ïa ka shit ka syaid kaba kala ai. To ngin peit ïa ka jingsneng ne jinghikai na kane ka khana.
Hadien kane ka jingpynbna, u shadkyrtoh [u klew] u la pynkhreh ïalade ban leit ban her sha sahit ban nguh ban dem ïa ka Meingi. Ka Meingi naduh ba ka la beh noh ïa la u jong u para u Bnai, da kaba burom bad da kaba sngewbha ka la pdiang burom ïa u Shatkyrtoh, ka leh bha leh sbun, pynjuh pynjan bad ka la kheiñ ïa u kum la ka jong u para. Kiwei ki para sim ki nangmut ba un sa wan phai biang ynda u la dep ka nguh ka dem ïa ka Meingi hynrei u shatkyrtoh naba u la juh bha bad sarong ban don ryngkat bad ka sngi, um shim la leit phai shuh. Kumta, ban pynwan phai biang ïa u, Shatkyrtoh, sha ka pyrthei, ki la sei da kawei ka buit kata da kaba bet ïa u symbai tyrso bad ba un phuh un plung bha bad kane ka dei ka buit jong kawei ka tymmen ïa kaba yn bet ha ka kper jong ka. Kumta, baroh ki la mynjur, bad ki la phira ïa kata ka kper ba kan phuh bad seilung bha ki sla. Kumta, ki tyrso ki la nang phuh hai shi hai bad dei ha kawei ka sngi, katba u Shatkyrtoh u dang shongkai marwei ula poi kynmaw biang ïa ki por mynshuwa mynba ha pyrthei lang bad ki para sim. Kumta, katba u nang pyndem la ki khmat na sahit sha pyrthei u la iohi pynban ba ha u lum uba u ju her bad sngew tynnad bha la don kaei re kaei kaba stem kmur-kmur i kumba la kup bad deng da ka ksiar baroh shirynieng. Marsien iohi ïa kane, ka mynsiem jong u ka la dik-dik ban tip kaei kaba kum kata. Kumta u la rai ban her biang sha ka pyrthei ban leit jngoh ïa kata ka jingstem kmur-kmur. Ka sngi ka la khroh la kjor ïa u ba un nym leit bad ba ka dei tang ka rongphong ka per tyrso ban pynthame ïa u. Hynrei u shadkyrtoh um shim la sngap ïaka, u la her beit beit sha ka pyrthei ban leit peit ïa kata ka jingstem kmur kmur ïa kaba u dang mut ba ka dei ka thei bhariew. Phewse, ynda u la poi ha kata ka jaka, u shem pynban ba ka dei tang ka per tyrso bad dei hangne ia ka jingkhyllew jong u la shah shet noh da ki para sim para doh.
Namarkata, kum ki briew, teng teng ngi sarong khyllew, ngi sngew ba kum mangi te ym don ne ba lah shuh. Kumjuh ruh ka jia ïa u sim klew, ba ha ka jingsarong jong u, u duh noh ïa kat ka jingieit ka Meingi. Ka Meingi namar ka ieit palat ïa u, ka ju don ka por ha kaba kam da ai jingshit jingsyaid ïa ka pyrthei. Kane ka ju jia ruh ïa ka jingieit briew ka bad u. Hynrei ïa kane ka jingieit ka Meingi, u Shadkyrtoh um shim la pynshongdor ne ñiewkor ïa ka. U sngew ba kata ka per tyrso kan kham lah ban ïa ka jingieit ka sngi. Katba kane baroh ka dei tang ka jingshet kylla ki para sim ïa u, ba ka sngi kan shit bad syaid kumba ka ju long. Namar kane, hun ka jingieit bad la u ne ka ym ban ryngkoh ruma tang namar ka jingsngewmeng.
