Istanbul, Risaw:
U President ka Turkey, u Recep Tayyip Erdogan ha ka Sngi Balang, u la iathuh ba ka Turkey ka dang ialeh ban iakren bad ka Hamas halor ka jingpyllait noh ia baroh ki nong Israel kiba shah rahbor bad shah bat naduh ka sngi ba leit hiar thma pyrshah ia ka Israel.
Ki don kumba katto katne ngut ki nong Israel kiba la shah rahbor ha katei ka kynhun lehnoh ha ka por ba ka Hamas ka leit ban thombor ia ka Israel ha ka Sngi Saitjaiñ jong ka taiew ba la leit.
Kumta, la ong ba utei u nongialam jong ka Turkey, uba la pynpaw ia ka mynsiem iarap jong u naka bynta ka Israel, u la iathuh ba u la ialeh ban iakren bad ki nongialam jong katei ka kynhun sha ki bynta Middle East halor ka jingpyllait noh ia kitei kiba ka la rahbor ha kine ki sngi ba la leit.
La ong ruh ba u Erdogan ha ka miet jong katei hi ka Sngi Balang, u la ioh ruh ban iakren bad u nongialam ka Saudi Arabia- u Crown Prince Mohammed Bin Salman bad u President ka Algeria- u Abdelmadjid Tebboune haba iadei bad ki lad jingiarap bad ki jingpyrshang ban ioh iarap ia ka Israel bad kumno ban tehlakam ia ki jingïakynad hapdeng ka Israel bad ka Palestine pat hadien- habud.
Ha katei ka sngi, utei u nongialam jong ka Turkey u la ong ba na ka liang jong ka Turkey, ka la ialeh katba ka kot bor ban iarap da kiba bun ki rukom ban ialeh ban tehalakam ia ka jingpur jong katei ka thma bad kumjuh ruh ban iarap ban pynkut noh ia katei ka jingïakynad kaba lah ban ktah ia ka pyrthei baroh kawei.
