Shillong, Risaw 13
Ka North Eastern Hill University (NEHU) ka la thaw da ka komiti ban wad bad tohkit bniah halor ka jingshah pynshitom jong uwei u samla pule ka skulbah ha ka step 8 tarik mynta u bnai ha Tura Campus.
“Ka long ka jingsngewkhia ba ngi hap ban pynsngew ïa kane ka jingjia ba sngewsih kaba la jia ha ‘Hostel’ jong ka NEHU, Tura Campus ha ki kynta step jong ka 8 tarik u Risaw,” la ong ka kyrwoh na u PRO ka NEHU.
Ka kyrwoh ka ong ruh ba ki bor pynïaid ka skulbah mar sien ïoh jingtip ïa katei ka jingjia, mar-mar ki la leh ïa kaba donkam ban khmih bniah halor kaei kaba la jia.
“Ka jingshngaiñ bad ka bit ka biang jong ki samla pule jong ngi ka long kaba hakhmat eh na bynta jong ngi, bad ngim lah pdiang satia ïa kiba kum kine ki jingjia ha ka shlem pule ka imlang-sahlang jong ngi,” la ong ka kyrwoh.
Haba ïadei bad katei, ka skulbah ka la thaw ïa ka komiti ka ban wad ïa ka jingshisha bad ban tohkit bniah halor katei ka jingjia.
“Ïa kane komiti yn khlieh da ka Prof. Lucy Zehol, Dean of the School of Human & Environmental Sciences. Ka Prof. Zehol ka dei ka dkhot ba donburom jong ka kynhun nonghikai jong ngi bad kaba la don bun-bun snem ha ka kam khamtam ha kaba ïadei bad ki mat kiba kham khluit, ha kajuh ka por ban pyntikna ïa ka jingtohkit ka bym shah liang,” la ong shuh ka kyrwoh.
Haba kdew ba ka Prof. Zehol kan sa leit sha NEHU, Tura Campus ban sdang noh mardor ïa ka jingtohkit, la ong ba ka komiti kan minot thop ha ka kam ba la bynshet ban lap ïa baroh ki jingshisha bad ban pynithuh ïa kiba donkti.
“Na ka liang ka NEHU kam kyrshan satia haba ïadei bad kano-kano ka bynta ba ïadei bad ka ‘ragging’ ne kino-kino ki jingpyndik hapoh ka skulbah. Lada jia ba katei ka jingjia ka dei kaba shisha, kito kiba donkti kin shah pynshitom tyngeh katkum ki kyndon ka skulbah bad ki aiñ jong ka ri,” la ong u PRO ha ka kyrwoh.
Ka skulbah ka kner ka jingkyrshan sha u lanot jong katei ka jingjia bad kular ba ka kan ïaleh katba lah ban pynbiang ïa ki lad jingsynran ba donkam kynthup ka jingïasyllok bad ban pyntikna ïa ka jingshngaiñ bad ka bit ka biang jong ki samla pule.
“Kiba kum kine ki jingjia ki long pyrshah ïa ki nongrim jong ngi bad ngin leh katba lah ha ka bor jong ngi ban khmih bniah ïa kane ka jingjia bad ban khang lad ïa kiba kum kine ki jait jingjia hadien-habud. Ngi kyrpad ïa ka NEHU baroh kawei ban mih shakhmat bad kino-kino ki jingtip kiba ïadei bad kane ka jingjia ne kiwei-kiwei ki mat kiba ktah ïa ka bha ka miat jong ki samla pule,” la ong shuh shuh ka kyrwoh.
Shuh shuh la bynrap, “Ngin ïai bteng ban trei lang kumjuh ban pyntikna ïa ka burom bad ka jinglong-jingman kaba shngaiñ na bynta baroh.”
Kum ban shu kdew hangne, uwei u samla pule 1st year jong ka tnad pule Agri Business Management na Nagaland uba dang shu pynïasoh shen bad ka Arabella Hostel jong ki shynrang ha NEHU Tura Campus, u la kynnoh ba la phah shad lyngkhuit ïa u ha ka kynhun jong kumba 5-6 ngut ki shynrang kiba na katei kajuh hi ka jaka sah.
Katei ka la paw pyrthei hadien ba utei u samla u la ujor sha u Proctor ka ‘Hostel’, Dr. Gino Sangma ha kaba na ka liang ki bor ba dei khmih ka NEHU ki la pynlong ïa ka jingtohkit halor katei ka bynta.
Katkum ka jingujor, katei ka jingjia ka la jia hadien ka shiteng synñia jong ka 8 tarik mynta u bnai.
U la kdew ba ha ka 8 tarik ha ka por kumba 1 baje mynstep, u la shah khot na kamra ha ka kynhun ki 5 ngut ki samla (kiba la heh klas ïa u) hadien ba ki la tied ïa ka jingkhang jong u. Uba sah lang bad u, u la ïohthiah ha katei ka por bad ym shym la don bording na bynta utei u lanot ban pynithuh ïa ki dkhot jong katei ka kynhun.
