Kolkata, Risaw:
Ka Mamata Banerjee ha ka sngi Palei ka la maham da kaba tyngeh ban pynlong da ka jingïakhih kaba jur jong ka seng Trinamul Congress kum shi bynta ban pynbor ïa ka sorkar jong u Narendra Modi ba un pyllait noh ïa ka pisa ba la dei ban siew sha ka jylla West Bengal kaba hap hapoh kiba bun ki skhim jong ka sorkar kmie ha kaba la byrngem ba ka jingïakhih kan sa nang jur bad ong ba ka blei Durga kan sa ïada ïa ka Bengal na ka jingïasuhbuit sniew ban pynshah thngan bad pynshah jingit ïa ka jylla.
“Ka sorkar kmie ka la khang ban pyllait ïa ka pisa ban pyntreikam na ka bynta ka Awas Yojana bad na ka bynta ka jingtrei kaba 100 shi sngi kaba hap hapoh ka skhim aikam- aijam hapoh ka MGNREGS.
Ka la pynsangeh ruh ban siew ïa ka pisa ban pyntreikam na ka bynta ka Gram Sadak Yojana,” la ong ka Myntri Rangbah jong ka West Bengal ka Banerjee ha ka sngi ba ka la leit ban plie paidbah ïa ki dara na ka bynta ka Durga Puja ha kylleng ki jaka jong ka jylla.
Kane ka dei ka jingmih kaba ha ka sien ba nyngkong jong ka Mamata hakhmat ki paidbah naduh ba ka la leit ban shah sumar sha SSKM Hospital ha ka 24 tarik, Nailur.
Kane ka la hap ban shu shong hapoh ïing naduh ba ka la wan ban phah sumar.
Ka seng Trinamul ka la pynshisha da kaba ong ba ka Bengal ka la sah ka pisa kaba la dei ban wan na ka sorkar kmie sha palat T. 1.15 lakh klur, ha kaba kumba T. 15,000 klur ka la dei ban leit tang sha ka Account jong ka MGNREGS bad ka Awas Yojana.
“Ki la dei ban ai ïa ka pisa kaba sah hapoh ka MGNREGS. Lada kim ai ïa ka pisa na ka bynta ka MGNREGS, ka jingïakhih kan sa nangjur,” la ong ka shongknor jong ka Trinamul Congress, lai sngi hadien ba ka la kyntu ïa u khun kha jong ka u Abhishek Banerjee ba un sangeh shwa ïa ka jingïakhih halor kane ka jingdawa haduh ka 31 tarik, Risaw.
