New Delhi, Risaw:
U Myntri uba dei khmih ïa ka Road Transport and Highways, u Nitin Gadkari, u la pynbna ba la pdiang ban pyllait ïa ki 7 tylli ki projek halor ban shna ïa ki jingkieng hapoh ka Setu Bandhan Scheme ha Arunachal Pradesh na ka bynta u snem ka kheiñ ka diah jong u 2023-24.
U la ai ïa kane ka jingpynbna ha ka khubor ba u la pyllait ha ka sngi Balang.
Kine ki projek ki don ïa ka jinglut kaba la antad ba kan long haduh T. 118.50 klur bad la khmih lynti ban nang pynbha ïa ka leit ka wan hapoh ka thaiñ, ban kyntiew ïa ka ïoh ka kot bad ka jingpynbiang bad pynbha ïa ka rukom im na ka bynta ki briew jong ka Arunachal Pradesh.
Kine ki projek ba la thmu ban pyntreikam ki kynthup ïa ka jingkieng RCC ka ban ïaid najrong jong ka wah Pacha ha Lachang, kaba la pynïasoh bad ka shnong Laimoya, Nerewa bad Sorrowa ha East Kameng District.
Sa kawei pat ka projek ka dei ka jingkieng RCC na Goang sha ka shnong Donigaon ka ban ïaid nalor jong ka wah Pacha ha Goang, ha ka lynti ban leit sha Donigaon kaba don ha East Kameng District.
Sa lai tylli kiwei pat ki jingkieng ki dei kiba la thmu ban shna ha NH-313, ka ban bteng na ka surok Roing-Anini sha ka shnong New Chidu lyngba ka NHPC Colony kaba don ha Lower Dibang District.
La don ruh ka Double Lane ka ban shna da ki Steel bad ka RCC Decking ha Kharsa, Dirang, ha West Kameng District. Nalor kine, yn shna ïa ka jingkieng RCC ha Pikte Point kaba don ha ki bynta jong ka wah Sigen ha kaba la ong ba kane kan sa pynïasoh bad ka shnong Tabiripo Saku ha ka surok Koyu-Goye ha Lower Siang District.
Shuh shuh kine ki projek ki kynthup ruh ïa ka jingkieng RCC ka ban ïaid nalor ka wah Ngopok ha ka surok Mebo-Dholla kaba don ha East Siang District bad ka jingkieng Steel Composite ban ïaid nalor ka wah Panyor ban pynïasoh bad ka shnong Chullyu bad Kebi hajan Yazali Agri-Farm kaba don ha Lower Subansiri District.
