Jerusalem, Risaw:
Ha kane ka khubor la ong ba 2 ngut ki pulit ka Israel ki la mynsaw ha ka jingjia hapoh Jerusalem ha ka Sngi Palei, hadien ba uwei u runar u la synreit kuli sha kitei ki heh pulit ha katei ka sngi. Ia utei u runar ruh la ioh ban siat bad kem noh da ki pulit.
Katkum ka dur-khih (video) ba la ioh ring na ki Camera CCTV ba la pyndait ha katei ka jaka, la iohi ia ki pulit kiba la leit ban mareh ha ryngkat ki suloi ha katei ka por ba ïohsngew ia ka jingriew ki ktang suloi.
Kane ka la jia ruh ha kum kane ka por katba ka Israel ka dang iakhun thma pyrshah ia ki lehnoh Hamas hapoh Gaza kaba la neh 6 sngi khlem sangeh, ha kaba ka jingïap ki briew ka la kot ia ka 3,700 tam bad ka tnat ka koit- ka khiah jong ka Palestine pat ka la pyntip ba ki don kumba 447 ngut ki khyllung-khynnah bad 248 ngut ki longkmie kiba khlad napdeng ki 1,417 ngut kiba khlad ha ka jingther ‘namding jong ka Israel sha Gaza.
Ha ka jingiakren bad ki lad pathai khubor ha katei ka sngi, u Myntri Rangbahduh ka Israel- u Benjamin Netanyahu u la ong ba ka United states ruh ka la kular ban ai jingkyrshan ia ka Israel ha katei ka jingiakhun thma jongka pyrshah ia ki lehnoh Hamas jong ka Palestine. Hynrei la kyntu ruh ia ka Palestine pat ba kan ym ai jingkyrshan ia kitei ki lehnoh kiba na ka ri jongka bad ba kan ialeh ban wanrah ia ka jingiabeit bad ka Israel kumba la dep ban iabeit hashwa bad ba la dep ruh ban iasoi ban ïasuk noh da baroh arliang ri.
Kumjuh ruh ka United Kingdom (Britain) ka la pynbna ba kan phah ia 2 tylli ki jhad thma ‘Royal Navy’ jongka sha Eastern Mediterranean bad ban phah leit syntiat ia ki liengsuiñ jongka sha kylleng sawdong ka Israel kum shi bynta ban ai jingkyrshan ia ka Israel bad ban pynrem ia ka jingleit thombor jong kitei ki lehnoh ia ka Israel ha kane ka kynti.
