London, Risaw:
Ka Sorkar Britain ha ka Sngi Palei ka la pynbna ba kan phah ia ki jhad thma ‘Royal Navy’ sha ka phang Mihngi jong ka Mediterranean sha ka Israel, kum shi bynta ban ai jingkyrshan ia ka Israel ha ka jingshah hiar thma ba kyndit ha ki lehnoh Hamas ha kane ka por.
Kumjuh ruh ka Britain ka la pynbna ba naduh ka Sngi Thohdieng kan phah ia ki liengsuiñ jongka ki ban leit pahara bad ban leit syntiat ia ka jinglong jingman ha kylleng jong ka Israel, khnang ban iohi ruh lada don kino- kino ki kynhun kiba leit pynpoi ia ki tiar siat bad ki jingiarap ne jingai jingkyrshan sha ki lehnoh Hamas.
Katei ka song jingiarap ba ka Britain kan phah sha Israel ha kane ka por kan kynthup ruh ia ka P8 Aircraft, 2 tylli ki jhad thma Royal Navy, ka RFA Lyme Bay bad RFA Argus, 3 tylli ki helicopter bad ka kynhun jong ki Royal Marine.
La ong ba kine ki jingiarap jong ka Britain baroh, ki long ban ai jingkyrshan ia ka Israel hapdeng ka jingiakhun thma jongka pyrshah ia kitei ki lehnoh jong ka Palestine bad ha kajuh ka por ruh ka long ban pynrem jur ia ka jingleh jong ki lehnoh Hamas bad ka jingleit thombor ba kyndit jongki ia ka Israel ha kane ka sien.
