Singapore, Risaw:
Kawei ka longkmie na Singapore, ka la shah kem noh hadien ba lap ia ka jingshukor ia 10 ngut ki briew kiba kynthup ia 3 ngut ki briew kiba la shah pynngop bad shah pynbiej da kaba ia iaid samla bad ka. Ia katei ka briew la ithuh kum ka Joceyln Kwek bad kaba la don 49 snem ka rta. Nangta la ong ba ka la ioh pdiang ia shibun ka pisa na kitei 3 ngut ki briew kiba ka don jingiadei bad kiba ka pan pisa da kaba thok ha kiba bun ki rukom. Napdeng kitei ki 3 ngut, uwei na ki, u la phah pynbiej wat ia ki kmie- ki kpa jong u tang ban ioh phah ia katei ka pisa sha katei ka briew kaba u ieid.
La ong ba ka Kwek ka la ioh kumba S$8,80,000 (US $6,46,000) na kitei ki briew da kaba ud bad thok ia ki ha ki rukom bapher. La ong ba ka la shukor ruh wat ia u paralok jong u kurim barim jongka haduh S$3,38,600 ka pisa, da kaba kular ban iarap ia u ban pynïoh long trai ri ‘Permanent Residence’ hapoh Singapore.
Namar kane, ka Kwek ha kane ka por, ka la shah pynngat ha kiba bun tylli ki kyndon pynkheiñ aiñ kiba iadei bad kitei ki jingleh pynkheiñ aiñ jongka. Bad katba ka ïingbishar ka dang pynbna ia ki kyndon ba la pynngat halor jongka, la tap noh ia ka dur khmat jongka hakhmat jong kiba bun paidbah hapoh ka ïingbishar.
Ka ïingbishar ka ioh jingtip ruh ba ka Kwek ka la poi ia ithuh bad u Lai Sze Yin, uba la shah pynbiej ha ka naduh u snem 2016, dei ha ka por ba u leit ban pynpoi tiar sha iing jongka.
Kumta, la ong ba nalor ba ka Kwek ka la don 2 ngut ki khun bad ka don ia u kurim, katba ka nud pat ban ia iaid sa bad u Lai. Watla katei ka briew kam ju iakynduh bad u Lai mar khmat, hynrei ka la lah ban pynngop bad pynbiej ia u man ka por bad ban ioh ia ka jingshaniah jong u da ka jingiakren lyngba jong ka phone kaba man la ka sngi.
Ka Kwek ka la pynbiej ruh ia u Lai ba un pyn kohnguh ha iing- ha sem naduh ka para bad wat ia ki kmie- kpa jong u ba kin ai pisa ia u haduh kumba S$1,50,000 da kaba thok ha iing ba ka long naka bynta ka ram ban thied kali ‘Car Loan’. Hynrei katei ka kam shukor jong ka Kwek ka la paw pyrthei hadien ba ka kmie jong u Lai, ka la leit ujor sha ki pulit ha u Risaw jong u snem 2018, ha kaba ka la iathuh ba ka samla jong u khun jongka, ka la khlong lut ia ka pisa bad ki jingdon- jingem na iing jongki wat haba ki la wad bad bun dien ia ka la shi snem tam hynrei kim shym lap ksai ia ka jaka ba ka shong- ka sah bad ia ki jingtip shaphang jongka. kumjuh ruh ia u Lai, ka ïingbishar ha u snem 2021, ka la rai ban set patok ia u haduh 15 bnai halor ka jingdon kti jong u ban pynbiej bad ialam bakla ia ki bahaiing- hasem jong u naka bynta ka briew.
Kine baroh ki long hadien ba ka Kwek ka la ngat ha ka jingkyrduh ‘Bankrupt’ ha u Kyllalyngkot jong u snem 2014 bad ka la poi haduh u pud ba kan pynbiej bad leh shukor wat ia ka kmie ieid trai jongka bad katei ka kmie ieid ka la ai haduh kumba 50 tylli ki jingdeng bad ki tiar ba rem dor bad ka Kwek ka la ioh ban leit die ia kitei ki jingdon jingem ka kmie ieid jongka bad ka la ioh ruh kumba S$48,250 ka pisa.
Hynrei, ka daw jong ka jingshah pynngat kyndon lang jong u Lai ka long namar ka jingiatrei lang jong ki baroh arngut, ban pynngop sa ia 2 ngut kiwei pat ki briew kiba la ia iaid bad ka Kwek bad kiba la shah pynngop kumjuh kumba long kitei kiwei hashwa jong ki.
