Shillong, Risaw 13
U Myntri Rangbah ka Jylla u Conrad K Sangma u la buh ïa u maw nongrim ban tei ïa ka Rongjeng Stadium ha East Garo Hills ha ka jinglut kaba T. 10 klur duna.
Ha kane ka prokram kaba la long ha ka sngi Palei, la ïadon lang u Myntri ka tnat ïalehkai u Bah Shakliar Warjri kumjuh ki MLA kiba kynthup ïa u Jim Sangma bad u Rupert Momin nalor kiwei pat.
Ha kane ka stadium la thmu ban tei ha ka jinglut kaba T. 9.25 klur, kaba kynthup ïa ka madan ïalehkai phutbol lem bad ki jaka shong jong ki paidbah nongpeitkai.
Haba ai jingkren ha katei ka sngi u Myntri Rangbah ka Jylla u Conrad Sangma u la pynkynmaw shaphang ka jingïohi jngai u kpa jong u, (L) P.A Sangma, uba don ka jingïadei kaba jan bha bad ki paidbah nongshong shnong ka Rongjeng.
U Sangma u la ong ba ka jingthmu ban thaw ïa ka Rongjeng Sub Division lem bad kiwei ki kam pynroi kin sa paw ha kane ka thaiñ, namar kane ka dei lyngba ka jingangnud bad ka jingïohi jngai u (L) PA Sangma na ka bynta ka Rongjeng.
Haba pynphai shaphang ki jaka ïalehkai, u Sangma u la ong ba naduh kine ki san snem ba la dep kata naduh u 2018, ka sorkar jylla ka la pynlut haduh T.400 klur tam haba ïanujor bad ki 45 snem kiba la leit.
Te kumta u la pynbna ha ki san snem ki ban wan, yn sa kynjoh sha ki T. 1000 klur ban pynlut na ka bynta ban tei ïa ki jaka ïalehkai ha kylleng ka Jylla. “Naduh ba la ïoh ïa ka Jylla ba pura haduh 2018, ym shym la pynlut khambun ha kaba ïadei bad ki jaka ïalehkai, hynrei mynta ngi la wan shakhmat ban pynlong ïa ki prokram na ka bynta ban kyntiew ïa ki kam ïalehkai ha ka Jylla.”
Shuh shuh u la ïathuh ba na ka liang ka Sorkar kan sa kyntiew ïa ki 25 tylli ki jaka ïalehkai phutbol ha ka Jylla da kaba yn sa siang noh da u phlang plastik (artificial turf). U la ong ba ïa kiwei ki jait jingïalehkai ruh yn sa ïaleh ban pynbiang na ka bynta baroh ki jingdonkam khnang ba ki khynnah ki samla kin kham pynleit jingmut ha ki kam ïalehkai bapher bapher.
U Sangma u la pynpaw ruh ba ïa ka Meghalaya Games 2023 yn sa pynlong ha Tura mynta u snem, ha kaba yn wan ïashim bynta da kumba 3000 ngut ki nongïalehkai na kylleng ka Jylla. “Ka thong ka jong ngi mynta ka long ban wanrah ïa ki jaka ïalehkai kiba paka khnang ba ki khynnah ïalehkai kin lah ban sei ïa la ki sap ïalehkai ba kyrpang jong ki,” u la bynrap.
Ha kawei pat ka liang u Myntri ka tnat ïalehkai u Bah Shakliar Warjri u la ong ba ka Sorkar Jylla ka la ïaleh katba lah ban kyntiew ïa ki kam ïalehkai ha ka Jylla. “Hapoh ka jingïalam u Myntri Rangbah u Conrad K Sangma, ngi la lah ban ïatrei lang ha ka ban wanrah ïa ki jaka ïalehkai kiba kham bha ha ka Jylla hi baroh kawei. Te kumta ngi kwah ban pynlong ïa ka Jylla kaba paw bha ha ki kam ïalehkai”.
