New Delhi, Risaw:
Ka Israel ka la ther da ki bom ïa ki artylli ki kad liengsuiñ kiba heh jong ka Ri Syria ha ka Sngi Palei.
Kine artylli ki kad liengsuiñ ka Syria ki dei kiba don ha ka nongbah Damascus bad Aleppo. Katkum ki khubor, la ong ba ka jingther bom ka la long kaba jur haduh katta-katta kat haduh ba kine kad liengsuiñ kim lah shuh ban treikam.
Katkum ka khubor ba la pynmih da ka SANA (Syrian Arab News Agency), la ong ba ka tnat Bar ri jong ka Syria ka la pynpaw ba ka jingthombor ka Israel ïa kitei kad liengsuiñ ka long tang ban nang pynpur ïa ka ding jong ka jingïakynad ha ka thaiñ baroh kawei bad kumjuh ruh ban leh klet ïa ka jingpynïap ïa ki nongshong shnong ka Palestine ha Gaza.
Ka tnat Bar ri jong ka Syria ka la ong ruh ba ka jingleh jong ka Israel ban thombor ïa kitei kad liengsuiñ ka long pyrshah ïa ki aiñ ha ka pyrthei bad ki kyndon jong ka United Nations.
