Sa shisien pat, ka aïom jong ki tamasa ka la wan. Kata ka Shillong Cherry Blossom Festival 2023 ka ban long ha madan Kurkalang ha Bhoirymbong, Ri-Bhoi, kan kjit ei haduh T. 9 klur ka pisa paidbah na ka bynta lai sngi – 17,18,19 tarik Naiwieng, 2023. Nalor jong kane, kin dang don bun sa kiwei pat ki tamasa pynbyrngia tat haduh ban da poi ka aïom Khristmas. Ha kane ka tamasa Cherry Blossom, kin wan ki nongrwai na shiliang duriaw ban pynsngewtynnad ïa ki paidbah kiba na kylleng bad ym tang na Meghalaya. Ki nongrwai kum u Ne-Yo, Ronan Keating bad kiwei ki la pynkhreh ban ïa wan pynbyrngia ïa ki nong Meghalaya bad na kiwei ki jaka ha madan Kurkalang. Wow! Ka jingsngewtynnad ban tip ïa kiba kum kine ki tamasa!
Kawei na ki jingïasyriem hapdeng u Myntri Rangbah Conrad K Sangma bad u Myntri Rangbah barim Mukul Sangma ka dei ka jingsngewtynnad ka jong ki ïa ki tamasa. Kine arngut ki lah ban don kata ka jingïashun saiñpyrthei, hynrei kaei kaba u Conrad u la sngewthuh bad ïohi na u Mukul ka long ka jingdonkam ban pynlong beit da ki tamasa kiba bun rukom. Pher tiak, la pynkylla tamasa. Phuh syntiew tiak, la kylla tamasa. Don um tiak, la kylla tamasa. Ïoh lad tiak, la wan ki tamasa ba laiphew jait laiphew skit haduh ban da i kdang sa ban peit. Tiak hangne bad tiak hangtai, tamasa puk-puk khlem jingsalia.
Lehse u Conrad bad u Mukul ki sngewthuh ba ki nongshong shnong jong ka Meghalaya ki dei kiba sngewtynnad ïa ki tamasa ba ha la ka rong. Ki tip shai ba ki paidbah kin ym ong eiei lada ka umbam umdih ka buh jingma ïa ka koit ka khiah lane lada ka jingkiew dor ki mar ki mata ki long shaba palat liam. Hynrei tang shu la ai tiak da i tamasa, hangta la klet lut ïa ki jingeh jingshitom bad jingjynjar. Ki ïa ñiom beit ha ki sur jingtem jingrwai jingshad. Ym donkam than ban da ïa pynbor ban ïa leit sha kita ki kam pynbyrngia ym kum ha ki kam kiba shisha bad kiba don nongrim. Ngi dei ban ïaroh ïa kane ka jingstad jong u Conrad bad Mukul namar ki sngewthuh shai ïa ka pyrkhat ka pyrdaiñ jong kiba bun ki nongshong shnong ka jylla.
Ngin kynnoh lei ïa ka sorkar ba ka pynlut T. 9 klur ne T. 90 klur haba ki nongshong shnong hi ki kwah ïa kine ki tamasa ba kin long man la ka taïew. Ngi dei ban ai jingïaroh pynban ïa ka sorkar namar ka sngewthuh ban pynlut ha ki kam ba ki briew ki sngewtynnad. Ha kine ki tamasa, ki paidbah ki ïohlad ruh ban die ïa ki mar ki mata bapher bapher haduh ba la i kulmar sa ban peit. Hynrei ki ïoh jingmyntoi pat lada ki nongwan ki pynlut ïa ka pisa jong ki ban thied ïa ki marbam mardih ne kiwei pat ki mar ki mata kiba ki buh ha ki dukan jong ki. Ngi dei ban ai jingmut ïa ka sorkar u Conrad ba kan pynlong tamasa man la ka taïew ha kylleng ki jaka khnang ba ki paidbah kin ïoh ban leit pynjahthait ïalade da kaba shad kyrñiom namar ki nongshong shnong kim don jingsalia wat lada ka jylla ka don hapdeng ka jingduk jingkyrduh, jinghiar kyrdan ha man baroh ki liang khamtam ha ka pule ka dangle, jingjaboh ka umbam bad ka lyer, jingjyllei sa ki surok ba dap da ki thliew ki syar, jingbun kiba pep skul shiteng por, jingduna ki samla kiba don ïa ki sap ban trei ban ktah, jingduna ki lad ai kam ai jam bad kumta ter-ter.
Koit kam pher. Kum ka jylla, ngi dei ban pdiang sngewbha ïa ki briew kiba nabar haba ki wan sha ki jaka jong ngi, bad ngi kyrmen ba kin ïoh jingmyntoi shikatdei. Ha kajuh ka rukom, ngi kyrmen ba ki nongshong shnong ka Meghalaya ruh kin ïoh jingmyntoi lang la ka dei da kaba die ïa ki marbam mardih ne kiwei ki mar ki mata ha ki lympung tamasa lane tang da kaba shu ïa ïoh pynkhih syngkai da kaba shad ïa ki sur jingrwai kiba bang bathiang. Ngin sa nang ïatai halor kane ka mat lem bad kiwei pat kiba kham kongsan ha ki sngi ki ban wan. To ai ba ki tamasa kin kharoi da ka jingkyrmen ba shisien ka sngi ka sorkar kan sa pynlong ïa ki tamasa man la ka taïew ha baroh ki distrik, block bad ki shnong ki thaw.
