New Delhi, Risaw:
Ka kynhun kaba nyngkong jong 200 ngut ki nong India kaba kynthup ki khynnah pule, ki nongtrei bad kiwei pat, ki la wanphai sha ka ri na Israel da ka liengsuiñ hynnin ka step jong ka sngi Thohdieng.
Ka India ka la pynlong ïa ka Operation Ajay na ka bynta kito kiba kwah ban wan phai ïing namar ka jingbteng jong ka jingshah hiar thma ki nong Israel ha ki lehnoh Hamas.
U Myntri jong ka sorkar kmie u Rajeev Chandrasekhar u la pdiang burom ïa ki nong India kiba la wan phai ha ka jaka sangeh liengsuiñ ha Delhi naba ki la poi ha ka jaka kaba la pynsuk mynsiem ïa ki hadien ka jingtieng jingsyier ban don ha katei ka ri.
U la ai khublei kti ïa ki. U Shashwat Singh, uba long u Post-Doctoral Researcher, uba la sah ha Israel naduh u snem 2019, u la poi ha Delhi ha ryngkat ka kurim jong u, ha kaba u la ïathuh shai shaphang kaei kaba la jia.
Kine ki nong India kiba la ïohlad ban wahphai ïing, ki la ïathuh ïa ka jingsngewtriem jong ka tham ka bym sangeh shuh ha kaba kane ka la pynbun jingmut jingpyrkhat ïa ki lada ki don ha kane ka ri kaba la shah hiar thma ha ki lehnoh.
Ki la pynpaw ka jingsngewnguh ïa u Myntri Rangbahduh ka ri u Narendra Modi bad ïa ki heh jong ka tnat ba dei khmih kiba la ïarap ban pynphai ïing ïa ki.
Kine baroh ki la kyrmen ba ka jingsuk kan leit phai bad ba kin ïohlad sa shisien ban bteng ïa ki jingpule bad ki kam jong ki.
Ka jingthombor jong ki lehnoh ka Hamas na Gaza naduh ka sngi Saitjaiñ jong ka taïew ba la lah pyrshah ïa ki nong Israel ka la pynlong ïa kumba 2,600 ngut ki briew ba kin duhnoh ïala kajong ka jingim.
