Shillong, Risaw 15
Ka skul ARPS Meghalaya ka la ïoh ban khur biang ïa ka jingjop ha ka jingïaleh -kai kaba ar jong ka lympung Subroto Cup kaba dang ïaid mynta shaphrang ha nongbah Delhi.
Haba phai sha ka jing-ïalehkai kaba ar kaba la long ha ka sngi U Blei, ka ARPS Meghalaya ka la lah ban pynliem noh ïa ka Navy School da 8-0 kol. Ha kane ka jingïalehkai kaba la noh shiliang, u Phermanbha Lyngdoh u la ïoh ban khyrwit hat-trick, katba ïa kiwei ki kol pat la thep da u Milli Putum, Rodrygo Sympli, Iminstar Mawlong, Siam-vangliana bad u Jason Malsawmtluanga.
Lah ban pynkynmaw ba ka ARPS Meghalaya ha ka jingïalehkai kaba nyngkong ka la lah ban pynliem noh ïa ka St. Francis da 14-0 kol bad ha ka sngi U Blei pat ka la jop da 8-0 kol, kumta haduh mynta ka la lah ban khyrwit haduh 22 tylli ki kol khlem pat shah thep kol.
Hadien kane ka jing-jop, mynta pat kan pyn-khreh ban ïakhun pyrshah sa ïa ka Tamil Nadu ka ban long ha ka 17 tarik mynta u bnai ha ka por 1.30 mynsngi.
