Shillong, Risaw 15
Ka Krang Sports Club bad ka Rynjah Sports Club ki la khur ïa ka jingjop ha ki jingïalehkai ka lympung SSA SRGT 3rd Division Football League 2023 ba la pynïaid da ka Shillong Sports Association (SSA) ha madan Third Ground MFA Turf, Polo.
Katba ar tylli kiwei ki jingïakhun jong kane ka lympung hapdeng ka Lawmali Pyllun Sports Club pyrshah ïa ka Tynring Sports Club bad ka Lumparing Sports Club pyrshah ïa ka Mawpat Sports Club ki la kut noh ha ka jingïakhaid.
Haba phai sha ka jingïalehkai ba nyngkong, ka Krang ka la pynliem noh ïa ka Umlyngka SC da 5-2 kol.
Ïa ki kol ka Krang la thep da u Kynsaining Thangmaw ha ka minit ba 8, u Willjohn Kyrsien ha ka minit ba 16, u Kyrpanglang Mawlong ha ka minit ba 20 bad 61 bad u Kostarfield K Budnah ha ka minit ba 60. Katba ïa ki ar tylli ki kol ka Umlyngka la thep da u Albin Jyrwa ha ka minit ba 66 bad u Riewdonsap Swer ha ka minit ba 69.
Haba phai pat sha ka jingïa-lehkai kaba ar, hapdeng ka Lawmali Pyllun pyrshah ïa ka Tynring ka la kut noh ha ka jingïakhaid khlem da don kiba pynkhih jar.
Ka jingïalehkai kaba lai hapdeng ka Lumparing pyrshah ïa ka Mawpat ka la kut noh ha ka jingïakhaid da mar shi kol. Ïa ka kol ka Lumparing la thep da u Iainehskhem Nongdhar ha ka minit ba 68 bad ïa ka kol ka Mawpat la thep da u Isatip Isamon ha ka minit ba 52.
Ha ka jingïakhun ba khatduh, ka Rynjah Sports Club ka la lah ban pynliem noh ïa ka Lumdiengjri Sports Club da 6-0 kol, ha ka jingïalehkai kaba la noh shiliang.
Ïa kine ki hynriew tylli ki kol jong ka Rynjah la ïoh ban khyrwit da u Wanshailang Warjri ha ka minit ba 4 bad 49, u Haskenroi Kharsati ha ka minit ba 17 bad 70, u Dameki Tariang ha ka minit ba 77 bad u Peacemaker Lyngdoh ha ka minit kaba 79.
Ki jingïalehkai ban long lashai ka sngi ka 16 tarik pat ha kane ka lympung, ki long ka Mawshbuit Sports Club kan ïakhun pyrshah ïa ka Pomlakrai Sports Club ha ka por 11 baje mynstep, ka MLP Football Team kan ïakhun pyrshah ïa ka Lapalang Sports Club ha ka por 1 baje mynsngi bad ka Gorkha Association kan ïakhun pyrshah ïa ka Nongmensong Sports Club ha ka por 3 baje janmiet.
