Tel Aviv, Risaw:
Haba pynsaphriang ia ki dur jong ka jingleh dusmon ki lehnoh Hamas ha ka Sngi Balang, u Myntri Rangbahduh ka Israel- u Benjamin Netanyahu u la ong ba ka kynhun lehnoh Hamas ka long kaba kham sniew shuh shuh ban ia ka ISIS bad kum kitei ki kynhun ki ju kwah ban bam duh ia ka ri baroh kawei lada ki iohlad ruh ban leh ha la ka mon. Namarkata, u la ong ba ym dei ban ailad ia kum kine ki lehnoh bad dei ban pynduh jait khoit khnang ba kin nym ioh bor shuh.
Ka Israel Defence Forces (IDF) ha katei ka sngi ka la pynbna ba ia ka bynta jong ka Gaza Division ruh la ioh ban kerkut bad ka la hap hapoh ka jingpeit jong ki shipai Israel ha kane ka por.
Kumta kin ym don shuh ki ban ioh leit rung ne iaid lyngba katei ka jaka ba la maham bad lada jia kumta, kan wanrah ia ka jingma kaba khraw ia ka suk ka shngaiñ ha katei ka bynta bad ha ka ri. Khnang ban pyntikna ia ka jingiaid beit iaid ryntih kumba la thmu ha katei ka jaka, ki bor pyniaid ka Israel ki la bthah ia ki paidbah ruh ba kin ym rung/mih shuh ha katei ka bynta ba la hap hapoh ka ‘Closed Military Zone’.
Namar shisien ba la ioh jingtip ba don ki dkhot jong ka Hamas, lane ki nongialam jong katei ka kynhun lehnoh, wat haba ki don kino- kino ki kyndon ne ki aiñ ruh, hynrei ki shipai ka Israel kin ther bad siat khlem jingmap.
Hynrei la ong ruh ba katba nang mih ki sngi, ka thma hapdeng ki lehnoh Hamas bad ki shipai ka Israel ka la nang i-shyrkhei bad nang kham jur, ha kaba da ki hajar ngut ki mynsiem briew ki la shu iap ei na baroh arliang.
Tad haduh jong ka step Sngi Palei, ka jingdon kiba khlad na katei ka thma ha Israel ka la kot ia ka 1,200 ngut. Katba ka Palestine pat ka la duh noh ia kumba 1,000 ngut ki mynsiem briew, kynthup ia ki khyllung- khynnah.
U Myntri ka tnat iada jong ka Israel- u Yoav Gallant u la iathuh ba ka tnat iada ka la dep bthah ia ki shipai Israel ban ker kut noh sbak ia ka Gaza Strip bad ban ioh synshar hi noh ha katei ka bynta.
Ha kajuh ka por ruh la ong ba ki shipai ka Israel ki la ther bom ia ka iingsah u kpa jong u Mohammed Deif, uba long u nongialam ba hakhlieh jong katei ka kynhun lehnoh Hamas bad ia uba la suba ba un dei u nongsuh buit bad nongbthah haba iadei bad katei ka kam thombor jong ki lehnoh Hamas hapoh Israel ha kane ka por.
