Arras, Risaw:
Uwei u khynnah 20 snem u la dung iap ia la u nonghikai bad pynmynsaw pat ia 2 ngut ha kawei ka skul kaba don ha ka thaiñ Shathei jong ka nongbah Arras hapoh France ha ka Sngi Thohdieng. U President ka France, u Emmanuel Macron u la pynrem jur halor kane ka jingjia bad ong ba kane ka long thik kum ka kam pyntriem jong ki lehnoh Islam.
La ong ruh ba dang ha ka sngi ba la leit, u Macron u dang dep ai jingkren bad kyntu ia ki paidbah nongshong shnong ka France ba ki dei ban iatylli kawei bad ban nym ailad ia ki kam thombor jong ki lehnoh, ioh ka leit jia kumba long ha Israel haba ki lehnoh ki la sngew skhem bad ioh bor na ka jingai lad jong ki bor pyniaid ri.
Haba leit jurip sha katei ka skul ha katei ka sngi, u Macron u la phah ia ka jingsngewlem sha ki bahaiing- hasem jong utei u nonghikai ba khlad, ia uba la ithuh kum u Dominique Bernard, namar ka jingkloi jong u ban mih shakhmat bad ban pyllait im ia kiwei pat kiba don ha katei ka sngi bad wat ban duh noh ia la ka jingim ha katei ka jingjia.
Ia utei u khynnah skul, la ithuh kyrteng kum u Mohamed M., uba la shah kem noh hadien kane ka jingjia bad u long ruh u khynnah skul barim jong ka Lycee Gambetta High School, ha kaba katei ka jingjia ka la jia ha katei ka sngi.
Ia utei u khynnah la aiti noh ha ka tnat tohkit ‘Anti-Terrorism’ namar la ong ba utei u khynnah ha katei ka sngi u la pyrta ia ka kyrteng ‘Allahu Akbar’ bad kumta kane ka long kaba ap jingma ia katei ka ri lada utei u khynnah u long u dkhot jong ka kynhun lehnoh Islam namar u hynmen ba heh jong u, u dei uba la shah kem bad shah set patok teng ha ki snem ba la leit namar ka jingdon kti ha ki kam thombor jong ki lehnoh Islamic.
