Bhopal, Risaw:
Ka General Secretary jong ka seng Congress ka Priyanka Gandhi Vadra ha ki khyndiat sngi ba la leit ka la kular ban pynïohei ïa ka jingnang jingstad bad ka jingïarap pisa kaba shisien shi bnai na ka bynta ki khynnah skul ha ka jylla ban pynlong ïa ka ilekshon ha Madhya Pradesh.
Ha ka por ba la pynlong ïa ka Jan Akrosh Rally jong ka seng Congress ha ka thaiñ ba shong basah ki riewlum ha Mandla, ka Priyanka ka la kular ban pyntreikam ïa ka Padho aur Padhao (pule bad hikai) Yojana.
“Ka jingpynnang pynstad ïa ki khynnah naduh klas 1 haduh klas12 kan long ka bym donkam ban siew eiei. Kane ka skhim ka dei kaba la tip kum ka Padho aur Padhao Yojana… Hapoh ka jingthmu jong kane ka jingpyntreikam, ki khynnah kiba naduh klas 1 hapoh 8 kin sa ioh pdiang ïa ka jingïarap pisa kaba T. 500 man u bnai, kito kiba pule ha ka klass 9 bad 10 kin sa ïoh jingïarap pisa da T. 1,000 shisien shi bnai, bad ki khynnah kiba pule ha ka klas 11 bad 12 kin sa ïoh ïa ka jingïarap pisa kaba mar T. 1,500 shisien shi bnai,” ka la ong, ha kaba ka la leit ban ïakynduh ïa ki kmie ki kpa bad kumjuh ïa ki longkmie kiba dei ki nongthep vote ha ka jylla.
Katkum ka jingïathuh jong ka EC, la ong ba ki la don baroh kumba 5.52 klur ngut ki nongthep vote ha Madhya Pradesh – 2.85 klur ngut ki shynrang, 2.67 klur ngut ki kynthei bad 1,336 ngut ki briew kiba don ïa ka jinglong kynthei bad shynrang.
Kumba la ïathuh da ka EC, la ong ba ki la don kumba 945 ngut ki kynthei kiba dei ki nongthep vote bad 1,000 ngut ki shynrang, kaba long pyrshah ïa ka jingdon jong ki 917 ngut ki kynthei ha u snem 2018.
