Jaipur, Risaw:
Ka kynhun jong ki lehnoh Maoist kiba la pynkhreh bha da ki tiar siat bad pynbthei ki la poi ha ki jaka sah pyngngad jong ki riewshimet ha ka distrik kaba don ha ka bynta kaba shaphang Shatei jong ka Kerala bad pyndonkam ïa ka Mobile Phone jong u Manager jong kane ka jaka ha ka ban phah jingthoh sha ki lad phah khubor shaphang ki jingleh jingkam jong ki.
Kane ka jingjia ka la jia ha Makkimala kaba hap hapoh ka jingkhmih jong ki pulit ka Thalappuzha ha ka por kumba 6.40 jong ka janmiet sngi Balang, la ïathuh ki pulit.
Kumba la pynshisha, la ong ba ka kynhun jong kine ki lehnoh kaba don ïa 6 ngut, ka la pyndonkam da ka Mobile Phone jong u nongtrei jong kane ka jaka, ha kaba ki la pynbor ïa u ba un phah lyngba ka WhatsApp ïa ki jingthoh bad ki jingkren jong ki sha ki lad phah khubor.
Kumba la ïathuh ki puilt, la ong ba ki la don kumba 23 ngut ki nongthoh khubor ha kylleng ki jaka jong ka jylla kiba la ïoh ïa kine ki jingthoh bad ki jingkren na ka kynhun Kabani Area Committee jong ki lehnoh CPI(Maoist).
Kane ka kynhun kam shym la pynmih ne phah ïa ki khubor ban byrngem ne ban buh jingeh ei ei hapoh kane ka jaka sah. Kine ki lehnoh ki la mih noh na kane ka jaka hadien ba ki la dep ban phah ïa ki jingthoh jong ki sha ki nongthoh khubor. Ïa kine ki jingthoh bad ki jingkren la ai da u briew uba la kam ïalade ba u dei u nongaiktien jong ka kynhun Kabani Area Committee jong ka Communist Party of India (Maoist).
Ki jingthoh kumba la sakhi, ki la long ruh halor ka jingwer ban don bynta ha ka jingïakhih da ki nongtrei ban ïoh ïa ka hok jong ki. Ka la don ka jingbuh jingthoh halor kane ka jingjia hapoh ka Unlawful Activities (Prevention) Act (UAPA) bad ka Arms Act, la ong u heh pulit.
