Beirut, Risaw:
Ka Hezbollah kaba dei ka kynhun lehnoh na Lebanon ha ka Sngi Thohdieng ka la pynbna ba la pynkhreh ban leit ai jingkyrshan noh ia ki lehnoh Hamas ha ka jing-iakhun thma pyrshah ia ka Israel.
Kane ka jingkren na utei u Deputy Chief ka Hezbollah, u Naim Qassem ka long ruh katba ka Israel bad ka Hamas ki dang don hapdeng ka jingiakhun thma kaba jur, ha kaba da ki spah ngut ki lehnoh Hamas ki la leit rung sha Israel bad ki la ioh ban pyniap ia kumba 1,300 tam ki nong Israel, bun na kitei kiba khlad na Israel ki dei hi ki riew paidbah.
Namar la ong ba ka Israel ka la ther bom bad ther ‘namding khlem sangeh sha ki jaka ba don ki lehnoh Hamas ha kylleng sawdong jong ka Gaza Strip bad kaba la shim ia ka jingim jong kumba 1,900 ngut ki briew, ha kaba bun ki dei ki riew paidbah bad kumba 600 tam ki dei ki khyllung- khynnah, la iathuh ka tnat ka koit ka khiah jong ka Palestine.
Kumta, u Qassem u la ong ba ka Hezbollah ka la shim ia ka rai ban ai jingkyrshan ia ka Hamas bad ka dang pyn-ap ia ka por ba kan mih bad ban iasnoh kti lang noh bad ka Hamas ha ka jing-iakhun thma pyrshah ia ka Israel.
Shuh shuh ruh utei u nongialam jong ka Hezbollah, u la ong ba watla kiba bun ki ri ki la kyntu ia ka Hezbollah ba kan ym leit ban ïadon bynta ne ban tuklar ha katei ka thma, namar kan ktah ia ki hi lada ki leh kumta. Hynrei u la ong ba ka Hezbollah ka jied ban shim ia la ka jong ka rai bad ka tip ruh ia la ka kamram ba ka dei ban leh.
La ong ba uwei u nongthoh khubor u la khlad noh bad 6 ngut pat ki la mynsaw katba ki dang don ha ka thaiñ khappud jong ka Southern Lebanon ha ka Sngi Thohdieng.
