Washington, Risaw:
Ki nongialam jong ka United States ha kane ka por ki la maham ia ka tnat iada jong ka United States ba kan long ba la pynkhreh lypa ia ki thma ki bym lah ban tip bad ka Russia bad kumjuh ka China, namar ka jingbym shngaiñ jong ka jinglong- jingman ha kine ki sngi ba mynta. Namar ba la iohi ruh ba ka China bad ka Russia ki la nang pynkhlaiñ ia ki tiar thma ‘Nuclear’ ha kine ki sngi wat la kine ki ri kim shym pynpaw ia ka jingthmu jong ki.
Kane ka long ruh hadien ba ka China ka la pyni bor haba iadei bad ka Taiwan, bad kumjuh ruh ka jingleit hiar thma ba khlem sangeh jong ka Russia pyrshah ia ka Ukraine kaba la sdang naduh u Rymphang jong u snem ba la leit bad kaba dang iaid tad haduh kane ka kynti.
Hynrei, katei ka kaiphod ba la ioh lum da ka tnat syntiat jong ka US, kam shym la pynpaw ne kynnoh pat ba ka jingpynkhreh jong ka China bad Russia ia ki tiar Nuclear kan don jingiadei ne kin iasnoh kti lang.
Hynrei, ka jingma kaba ap, ka long namar ba ioh kitei ki 2 tylli ki ri (China & Russia), kin iasnoh kti lang ban pynheh ia ka thma hadien habud bad kumta ka long kaba kongsan ban pynkhreh lypa hashwa ba kita baroh kin jia.
