Shillong, Risaw 15
Ka Meghalaya Football Association (MFA) ka la rai ban siew dep noh ïa ka pisa kaba sah sha baroh ki kynhun kiba ïashim bynta ha ka Amateur League kaba khlem lah shuh ban pynkut.
Ïa kane ka rai la shimti da kane ka synjuk hadien ka jingwan shimti da ki dkhot bathymmai hapoh ka jingïalam u Bah Hamletson Dohling kum u President bad u Bah Sunesh M Syiem kum u General Secretary.
Ka jingpynlong ïa ka Amateur League la shu leh donbor tang da ki ar ngut ki dkhot barim naba kiwei pat ki dkhot kim don jingtip eiei. Kumta ïa kane ka lympung la khmih lynti ban pynkut ha ki khyndai bnai ki ban wan naduh ba la sdang ha u Jylliew jong u snem 2022, hynrei ka la shu pulom noh khlem da lah ban pynkut ïa ka.
Te kumta dang shen na ki liang 20 tylli ki kynhun ki la dawa ba pynphai noh ïa ka bai rung kaba ki la dep siew sha ka MFA.
Haba ïakren bad ki nongthoh khubor ha ka sngi Saitjaiñ hadien ba la dep ban pynthymmai ïa ki nongkitkam ka MFA, u General Secretary kane ka synjuk u Bah Sunesh Syiem u la ïathuh ba ka synjuk kan sa pynphai noh ïa ka pisa sha baroh ki kynhun ïalehkai.
“Hadien ba ngi la shimti kum ki dkhot kiba thymmai ka MFA, ngi la rai da kawei ka jingmut ban bteng biang ïa ki jingïalehkai ba dangsah jong ka Amateur League, hynrei na ka liang kiba bun ki kynhun ïalehkai ki la pynpaw ba ki la thait ban bteng ïashim bynta biang hadien ba la pynsangeh kumba katto katne bnai.”
“Kitei ki kynhun ki la dawa ban pynphai noh ïa ka pisa kaba ki la dep siew sha ka MFA. Te kumta ngi na ka liang ka ka synjuk kaba thymmai ngi la rai da kawei ka jingmut bad kata ka long ban kheiñ shwa ïa ki jinglut jingsep kum ki bai rephri bad kiwei kiba la dep pynlong ïa ka wat kaba nyngkong. Hadien kata ïa kaba sah ngin sa pynphai noh ïa ka pisa sha baroh ki kynhun ïalehkai.”
