Shillong, Risaw 15
U Bah Roy Kupar Synrem, u la shah jied kum u President bathymmai ka Hynñiewtrep Youth Council (HYC) na bynta ka samoi treikam 2023-2026 ha ka General Executive Council (GEC) jong ka seng kaba la long ha ka Sngi Saitjaiñ.
Ïa u Bah Synrem yn synran lang da u Bah Donboklang Kharlyngdoh bad Bah Francis Gee Mawlong kum ki Vice-President ryngkat u Bah Rhembor G. Saibon kum u General Secretary.
U Bah Issac W. Basaïawmoit bad u Bah Lumlang Kharsyiemlieh ki la shah jied kum ki Secretary jong ka seng.
Ki President barim – Bah Roberjune Kharjahrin, un shim ïa ka bynta kum u khlieh nongaibuit jong ka seng katba u Bah Peter J. Lawai un long u nongaibuit jong ka HYC.
Ha kajuh ka por, la jied ruh ïa 4 ngut ki Joint Secretary ba kynthup ïa u Bah Daniel Syiem, Bah Mandor Swer, Bah Yoohunki Shylla bad Bah Pynskhem Kharjahrin nalor kiwei-kiwei ki dkhot.
Ka GEC jong ka seng kaba kynthup naduh ki President bad General Secretary jong ki shnat, jylli, distrik lem bad ki tnad treikam ba kynthup ïa ka Women’s Wing ha ryngkat ki dkhot ki barim jong ka Central Executive Committee (CEC) ka la long ha ka 14 tarik u Risaw, 2023 ha Shillong. Ka jingjied ïa ki nongkitkam bathymmai jong ka Central Executive Council (CEC) kan long na bynta ka samoi treikam 2023-2026.
Ïa ka GEC ha katei ka sngi la pynïaid da u samla rangbah Peter J. Lawai, Chairman ka Caretaker Body, uba long ruh u President barim ka seng ha ryngkat ka jingdonlang u samla Bah Nickson Dohling, kum u Secretary ka Caretaker Body, uba long ruh u Vice-President barim ka seng.
Ha katei ka sngi lah ïoh ruh ban pynsngew ïa ka kaiphod treikam jong ka CEC ha kane ka samoi treikam kaba la dep.
Shuh shuh ha katei ka GEC, ki dkhot da kawei ka sur ki la rai ban jied ïa ki nongïalam bad ki dkhot jong ka CEC na ka bynta ka samoi treikam 2023-2026.
Ïa ka jingpynskhem bad jingpyntian smai ïa ki nongkitkam ka CEC yn pynlong ha ka 11 tarik u Naiwieng, 2023 ha Shillong. Kane ka long katkum ka kyrwoh na u Chief Organising Secretary ka HYC-CEC, Bah John N. Lyngdoh.
