Lucknow, Risaw:
Ka ïingbishar ha Rampur kaba don ha Uttar Pradesh ha ka sngi Thohdieng ka la rai pynrem ïa ki 24 ngut ki briew ha kaba bun na ki ki dei ki shipai ïada da 10 snem ha patok halor ka jingshalan jong ki ïa ki tiar ïasiat sha ki lehnoh bad sha ki Maoist ha kaba ïadei bad ka mukotduma ba la mudui ha u snem 2010.
Kiba bun na kiba la shah rai pynrem ki dei ki heh jong ki pulit ka Uttar Pradesh, Police, jong ka Provincial Armed Constabulary (PAC) ne ka Central Reserve Police Force (CRPF). Uwei napdeng kiba la shah kynnoh u la ïap ha ka por ba u dang don hapdeng ka jingshah bishar kaba la kut da palat 10 snem.
U Rampur Additional District Government Counsel (Criminal) u Pratap Singh Maurya ha ka sngi Thohdieng u la ong, “Mynta ha kaba ïadei bad ka jingjia halor ki kartoos (ki tiar ïasiat), ka ïingbishar Rampur ka la rai pynrem ïa ki 24 ngut ha kaba kin shah set patok da 10 snem ha ryngkat ka jingshah daiñ kuna kaba mar T.10,000.
Ïa baroh kine kiba la shah kynnoh la ïalam sha patok ha ka sngi Palei hadien ba ka ïingbishar ka la rai pynrem ïa ki.
Ha ka jingbatai bniah shaphang ka jingjia u la ong, “Ka jingjia ka la jia ha u snem 2010 haba u Superintendent jong ka kynhun Special Task Force (STF) ha Lucknow u la ïoh jingtip ba ka don kumba katto katne ki tiar ïasiat ïa kiba la shalan sha ki lehnoh Naxalite bad ki lehnoh na Rampur lyngba ki briew ha Allahabad. La thaw ïa ka kynhun bad ha ka 29 tarik, Ïaïong,2010, ka kynhun ka la leit sha Rampur bad kem ïa lai ngut ki briew, ïa kiba la tip kyrteng kum u Yashodhanand, Vinoj Paswan bad u Vinesh Kumar. Ïa ki kuli ba la thep ha ki 12 tylli ki borni bad ha ki katto katne ki bynta na ka bynta ban buh ïa ki tiar siat la lap noh. Ka la don ka jingujor ejahar bad ki la shah aiti ha ki kti jong ka aiñ. Haba la pynithuh da u Yashodhanand, sa uwei pat u briew ïa uba la tip kyrteng kum u Nathiram Saini u ka shahkem na Moradabad.” Ki heh pulit ki la ïathuh ba ki la don kumba 25 ngut ki briew kiba la shah kynnoh donkti ha kane ka jingjia bad ki la shahkem ha ka por ba la pynlong ïa ka jingtohkit.
“U Yashodhanand u la pynbiang ka kot thoh kynmaw kaba don bad ki kyrteng jong kine kiba la shah kynnoh bad kumjuh ka jingbatai bniah ïa ki Bank Account. Kine ki 25 ngut ki la shah pynmih kyrteng ruh ha ka jingshah mudui mukotduma. Na ki 25 ngut, uwei u la ïap noh ha ka por ba u dang don hapdeng ka jingshah tohkit,” la ong u Maurya.
Baroh kine kiba la shah kynnoh donkti ki la shah rai pynrem hapoh ki kyndon jong ka Indian Penal Code kiba kynthup ïa ka 409, 413 bad hapoh ka 120B. “Ki la don kumba katto katne ngut ki heh ka PAC, katto katne ngut ki CRPF, katto katne ngut ki heh pulit ka UP bad katto katne ngut ki riewpaidbah,” u la bynrap.
