![Shano ki kali pynlip kiba kham rit kumba la pynpaw hadien ba pluh ka Ïingmane ha Qualapatty? Kali pynlip ding](https://unongsainhima.com/wp-content/uploads/2023/10/Kali-pynlip-ding.jpg)
Shillong, Risaw 15
Ka jingpluh ha Khyndai Lad bad ka jingshem jingeh ki kali pynlip ding ban poi sha ka jaka ba jia ka la pynkynmaw biang ïa ka jingpluh jong ka Ïingmane ha Qualapatty kumba hynriew snem mynshwa.
Ka jingpluh ka Ïingmane jong ka Balang U Blei ha Qualapatty khyndiat snem mynshwa ka la buh jingeh ïa ki kali pynlip ding ban poi kloi sha ka jaka ba jia namar ka jingkhim ki surok. Ka jingbym lah ban poi kloi ki kali pynlip ding bunsien ka ju pynlong ban bamduh lut ka ding ïa ki jingdon jingem baroh.
Kane ka jingjia ha Qualapatty ka la pynpyrkhat ïa ki bor Sorkar ban pyrkhat noh ban buh da ki kali pynlip ding kiba kham rit khnang ba kin lah ban rung sha ki surok barit ban leit tem lada jia ka jingpluh ding.
Hynrei ïa kane ka jingpyrkhat imat ym shym la pynurlong da ka Sorkar namar ki pulit pynlip ding ki shem jingeh bha haduh mynta ban leit pynlip ding lada ka jia ka jingpluh ha kano kano ka jaka ba bun ki paidbah bad jaka ba khim ki surok.
Kumta ka jingpluh ha Khyndai Lad kaba la jia ha ka sngi Saitjaiñ ka 14 tarik Risaw 2023, ka dei ka jingjia kumba jia ka jingpluh ha Qualapatty khyndiat snem mynshwa.
Ha kane ka jingjia ruh ki kali pynlip ding ki shem jingeh ban poi kloi sha ka jaka ba pluh ha Thana Road kaba don shapoh jong ka Khyndai Lad namar ka dei ka jaka ba bun ki paidbah bad ki lynti ruh ki dei kiba khim ban ïaid ki kali pynlip ding kiba heh.
Ka jingeh ki pulit pynlip ding ban pynpoi kloi ïa ki kali kit um ka dei ruh namarba ka Khyndai Lad ka dei ka ïew kaba heh bad kaba thnem bha ka ïadie ïathied ki paidbah.
Ka jingpynkhreh ka Sorkar ban ïarap haba jia kano kano jinglynshop lehse kam shym la seisoh bha, namar wat haba pluh tang kawei ka ïing ha Khyndai Lad, ki paidbah ki hap ban mad jingeh ha baroh kawei ka sor Shillong bad ym don satia kita ki kali pynlip ding kiba kham rit kiba suk ban rung sha ki jaka ba khim ki lynti ne surok.
Lehse, mynta ka sien, ka Sorkar kan pynïoh noh kloi ki kali pynlip ding kiba kham rit ha baroh ki jaka sor ne nongbah.