Geneva, Risaw:
U nongialam ba hakhlieh jong ka World Health Organization (WHO), u Tedros Adhanom Ghebreyesus ha kane ka kynti u la kyntu ia ka kynhun lehnoh Hamas ban pyllait noh ia baroh ki riew paidbah kiba ka la rahbor naduh ba sdang ka jing-leit hiar thma pyrshah ia ka Israel. Nangta u la maham ruh ia katei ka kynhun bad ong ba kine ki kynhun lehnoh Islamic ki kwah tang ban pynjot- pynjulor bad ka jingdon kynhun jong ki ka long ka bym don jingmut nalor jong kata.
Kumta, utei u nong-ialam jong ka WHO u la iathuh ba ka tnat WHO hi baroh kawei ka sngewkhia halor ka jingshah hiar thma jong ka Israel ha kane ka kynti bad ka jingiakhun thma jong ki lehnoh Hamas bad ka Israel, ka wanrah jingeh bad pynshitom pat ia ki khyllung-khynnah kiba dang lui-lui bad ki bym pat tip ia kaei-kaei ruh.
Ha kajuh ka por ruh u la ong ba ka thma, da lei-lei ruh kan nym wanrah jingmyntoi ne pynïoh nong ïano-ïano ruh. Hynrei ka thma ka wanrah tang ia ka jingjot- jingjulor, ha kaba ki paidbah ba lui-lui ki hap ban mad ia ka jingim ba shyrkhei bad ka jingim kaba ap jingma kat sha ba phai.
Ka Israel ha ka Sngi U Blei ba la lah, ka la pynbna ia ka thma pyrshah ia ki lehnoh Hamas, hadien ba ki la leit ban pyniap, ban khrai khlieh bad ban thang im ia kumba 1,400 tam ki nong Israel bad kiba bun ki dei hi ki riew paidbah.
Kumjuh ruh na ka jinghiar thma kylliang jong ka Israel ia kitei ki lehnoh, ka la shim ia ka jingim jong palat 2,670 ngut ki nong Palestine hapoh Gaza Strip, ha kaba bun na kitei kiba khlad ha katei ka ri ruh ki dei hi ki riew paidbah ba lui-lui.
Haba iadei bad kane, ka tnat shipai jong ka Israel ka la pyntikna ba ki don haduh 155 ngut kiba la shah rahbor bad kiba dang shah bat ha ki lehnoh Hamas naduh ka por ba ki lehnoh Hamas ki leit ban thombor ia ka Israel ha ki taiew ba la leit.
Namarkata, ka WHO ha kane ka kynti ka la kyntu ia ka Hamas ba kan pyllait noh ia kitei ki mynsiem ba lui-lui kiba ka la rahbor bad set tad haduh kine ki sngi, khnang ba kano- kano kaba sngewsih kan ym jia ia ki hadien habud.
Ha kajuh ruh ka por, ka WHO ka la pynpaw ia ka jingsngewkhia halor ka jingthombor kylliang jong ka Israel ruh ia ka Gaza ha kaba da ki hajar ngut ki mynsiem briew ba lui- lui na katei ka liang ruh ki la shu iap bad duh ei.
Namar la ong ruh ba ka jing-ai por jong ka Israel ia ki paidbah ban mih na North sha South jong ka Gaza tang ha i por ba khyndiat, kan wanrah jingeh shibun ia ki paidbah nongshong shnong ka Gaza bad kin hap ban mad pat ia ki jingeh ba bun naduh ka bam- ka dih bad kiwei ki jingdonkam ba man la ka sngi.
Shuh shuh ruh ka WHO ka la kyntu ia ka Israel ba kan pynpoi biang noh wat ia ka bor ding ilektrik ruh namar ka long ka jingeh kaba khraw ia ki paidbah ban im khlem ka bor ding ha kine ki sngi ba mynta.
