Shillong, Risaw 16
Ka Meghalaya Police Football Team ka la bteng ïa ka jingjop ba lai ha ka SSA SRGT Third Division Football League 2023 hadien ba lah pynliem noh ïa ka Lapalang SC da 7-1 kol ha ka lah sngi U Blei ha madan Polo.
U Ambrous Syngkli ha kane ka jingïakhun u la khur ïa ka hat-trick da kaba thep saw kol na ka bynta ban pynlong ïa kane ka kynhun jong ki pulit ban lamkhmat na ka Group-A da kaba 9 point.
Haba phai sha kane jingïalehkai la ong ba tang ha ki shiteng kynta ka MLP ka la thep ar kol lyngba u Bisharlang Kharumnuid (30) bad u Donalius Lapang (38). U Ambrous u la khur ïa ka hat-trick hadien ba u la ïoh ban thep ha ka minit kaba 51, 63, 78 & 81 bad ïa kawei pat la thep da u Everestarly Rynjah (83). Ïa ka Lapalang la thep da u Vishal Das- (69).
Ha kawei ka jingïakhun jong kane ka group, ka Nongmensong SC ka la wanphai da ka jingjop kaba nyngkong hadien ba ka la pynliem noh ïa ka Gorkha Association da 4-0 kol. U Shemphang Myrthong u la thep ar kol ha ka minit kaba 2 & 36, katba ïa kiwei pat la thep da u Mychel B Nongsiej (53) bad u Rishanlang Myrthong (66).
Haba phai sha ka jingïakhun jong ka Group-B, ka Mawshbuit SC ka la wanphai da ka jingjop kaba nyngkong hadien ba ka la jop da 4-0 kol ïa ka Pomlakrai SC. U Ïainehskhem Mawri u la thep ar kol ha ka minit kaba 19 & 69, katba ïa kiwei pat la thep da u Lurshai Wankhar (34) bad u Charming Nongdhar (72).
Kane ka lympung kan bteng biang ha ka sngi Ba-ar ha kaba ka Sanmer SC kan ïakhun pyrshah ïa ka Mawpat SC, katba ka Mylliem Lum SC ïa ka Lamparing SC bad ka Mawryngkneng SC ïa ka PFR F.A.
