Nongstoiñ, Risaw 16
Ka Nongstoiñ District Sports Association (NDSA) ha ka lah sngi U Blei ka la plie pyrda ïa ka lympung ïalehkai 3rd bad 2nd Division NDSA League Football Tournament 2023.
Ha ka jingïakhun Third Division ha kane ka sngi plie, ka Wahdihbah SC ka la khur ïa ka jingjop hadien ba ka pynliem noh da 3-2 kol ïa ka Pydengshnong YC ha madan NDSA, Nongpyndeng
Nangta ha kawei pat ka jingïalehkai ka Sohparu SC ka la pynliem noh ïa ka Tiehbah SC da 1-0 kol, ka Mawthawniaw SC ka la pynliem noh da 2-0 kol ïa ka Mawpun FT- New Nongstoiñ bad ka Sohlait FC ka la pynliem noh da 2-0 ïa ka Dommawlien SC.
Haba phai sha kiwei pat ki jingïalehkai jong ka 3rd Division kaba la long ha kane kajuh ka sngi, ka Swahmawïong FC ka la pynliem noh da 2-1 kol ïa ka Mawkynjoin SC, katba ka Dommawlien FC ka la jop da 1-0 kol ïa ka Krohkhla FT.
Ha kawei pat ka liang, ka jingïalehkai jong ka Second Division pat kan long ha ka 18 tarik mynta u bnai.
Ha katei ka sngi plie ïa kane ka lympung, ki nongkitkam ka NDSA ba kynthup ïa u Bah Mt. Gordon Marngar, General Secretary ka NDSA, u Bah S. Kharlor, President, Dr. Lumbor Mawsor, Chairman ka Football Committee, u Bah H.D. Lyngdoh, Chairman Referee Committee bad kiwei pat kiba ka ïa don lang.
Lah ban kadew hangne ba ha kane ka lympung ïalehkai jong ka 3rd Division, ki don haduh 48 tylli ki kynhun kiba la wan ban ïashim bynta, katba ha ka 2nd Division ki don haduh 16 tylli ki kynhun.
