Jerusalem, Risaw:
U Myntri ka tnat ‘Energy’ jong ka Israel ha ka Sngi U Blei, u la iathuh ba ka Israel ka la sdang pynpoi umbam-umdih biang sha ka phang Shathie jong ka Gaza hadien da ki million ngut ki paidbah nongshong shnong ki la mih noh na katei ka thaiñ Shatei jong ka Gaza Strip namar ka jingsheptieng ia ki bom bad ki ‘namding ba la ther da ka Israel sha katei ka ri.
Kumta, la ong ba kane kan pynlong ia ki paidbah nongshong shnong ka Gaza baroh ba kin leit ban phet sha katei ka phang Shathie jong ka Gaza Strip, namar ka jingeh ba ki iakynduh hadien shi taiew ba la Israel ka la pynduh um bad pynkut noh ia ka jingpynpoi um sha Gaza namar ka jing-leit hiar thma jong ki lehnoh Hamas ha kine ki taiew ba la leit.
Kumta, utei u Myntri ka Israel u la iathuh ba ia ka rai ban pynpoi um biang sha Gaza, la shim hadien ka jingiakren hapdeng u Myntri Rangbahduh ka Israel- u Benjamin Netanyahu bad u President ka United States- u Joe Biden, halor ki jingeh bad jingjynjar jong ki paidbah ba shong ba sah hapoh Gaza namar ka jingkyrduh um bad jingkyrduh bam ha kane ka por.
U Advisor ka tnat National Security jong ka United States- u Jake Sullivan ha ki khyndiat kynta ba la leit ha katei hi ka sngi, u la ong ba ka Israel ka la pyntip ia u ba ka Israel ka la pyllait um biang ban pynpoi sha Gaza hadien shi taiew ba ka la khang noh ia ka jingpynpoi um sha baroh ki bynta jong ka Gaza.
Kumjuh ruh na ka liang ka tnat Municipal jong ka Beni Suheila hapoh Shathie Gaza, hadien katto katne kynta ba la ïohsngew ia kitei ki jingpynbna na ka Israel, katei ka tnat na Gaza ruh ka la pyn tikna ba ka um ka la poi sha katei ka bynta bad sha ki shnong bapher jong katei ka bynta.
La ong ba ka jingleit ther bom jong ka Israel nalor suiñ, ka la shim ia ka jingim jong kumba 2,450 tam ki briew hapoh u pud- u sam jong ka Palestine tad haduh jong ka Sngi U Blei.
La buh jingkheiñ antad ruh ba kumba shi million ngut ki paidbah nongshong shnong ki la sakma bad phet lymwir hapoh jong ki 7 sngi ba la leit, naduh ba sdang ka jingiakhun thma jong ka Israel bad ki lehnoh Hamas hapoh Gaza.
