Jerusalem, Risaw:
Katkum ki khubor, la ong ba 2 ngut ki kynthei Israel, kiba dei ki heh ka tnat Pahara bad kiba dei ruh ki nong India, ki la khlad noh ha ka jingthombor bad jingther bom ba khlem sangeh jong ki lehnoh Palestine ha kine ki khyndiat sngi ba la leit. Kumjuh ruh kawei ka nong India ha ka Sngi U Blei ki la pyntikna ia kane ba kitei ki 2 ngut ki nong India-Israel kim don shuh bad ki la khlad hapdeng ka jingthombor jong ki lehnoh Hamas ha kine ki khyndiat por ba la leit.
La ong ba kitei ki 2 ngut ki kynthup ia ka heh pulit Or Moses,22 snem ka rta, kaba long ka Commander jong ka Home Front Command na Ashdod bad katei kawei pat- ka Kim Dokraker, kaba long ka Border Police Officer na ka Central District bad kitei ki 2 ngut ki la khlad noh hapdeng ka kam hadien ka jingleit thombor jong ki lehnoh Hamas ia ka Israel ha ka 7 tarik jong une u Risaw.
Katkum ka jingai jingkheiñ jong ki heh ka Israel, la iathuh ba ki don kumba 286 ngut ki shipai bad 51 ngut ki pulit kiba la khlad hapdeng ka jingiakhun thma jong ka Israel bad ki lehnoh Hamas jong ka Palestine.
Hynrei, katei ka jingkheiñ ka lah ban kiew shuh shuh katba ki bor pyniaid ka Israel ki dang ialeh ban pynithuh ia baroh kito kiba la khlad ha ka jingshah thombor ha ki lehnoh Hamas naduh ba sdang ka thma haduh kine ki sngi bad don ruh kiba la shu jah rngai kumto bad ki lah ban long kito kiba la shah rahbor lane kiba la shah pyniap klep ha ki jaka bym lah ban shem.
Kawei na ki heh pulit kiba ïadon ha khappud jong ka Israel ha ka por ba ki lehnoh Hamas ki sdang ban leit thombor nyngkong eh, ka la iathuh ba kam lah ban mutdur kumno ka dang lait-im na ka kti jong ki lehnoh ka Palestine namar ha katei ka sngi ba sdang ka thma, katba katei ka pulit bad uwei pat u pulit, ki dang ïeng habar ka thanat ba ki dei khmih, ha kaba bun tylli ki ‘namding ki la wan ban her nalor suiñ bad da ka jingkyndit, ka la kylli ia utei u pulit ‘Kaei kato kaba wan her?’, ha kaba utei u pulit u la jubab bad ong ba ki dei ki ‘namding ‘Missiles’ bad kumta ki la ia phet mar-mar na katei ka jaka ba ki ïeng ban leit beit-beit sha ka kali pulit kaba don ha katei ka jaka.
Hynrei hadien ba ki la mih na katei ka jaka bad ki la pynher stet ia ka kali katba lah, uwei na ki pulit uba iakren badki lyngba jong ka phone, u la phah ia ki ban leit sha ka liang ka mon, hynrei namar ba ki mut ban leit phet sha Tel Aviv, kumta ki la phai dien biang bad leit sha kawei pat ka liang ka ban pynpoi sha Tel Aviv. Hynrei shwa ba kin poi ha katei ka jaka ba ki thmu, ki iohi ia 2 tylli ki kali bad ki kynhun lehnoh ba la kerkut ia ka surok ba ki dei ban iaid lyngba bad kumta hi ki la phai noh wak ia ka kali bad phet biang shadien ha ryngkat ka jingshah synreit kuli naphang ha kitei ki lehnoh bad ka long kaba don bok ba ki kuli ki la ksam tang ia ka kali hynrei kim shym dei ia kitei ki baroh 2ngut.
Kumta ki la phet sha ka jaka ba kham khlaw bad ki la iarieh shuwa hangta haduh ban da kham duna ka jingsawa ki ktang suloi ba kitei ki lehnoh ki siat bad beh kthong ia ki.
Hadien kata, ki la leit rung biang sha ka kali ba ki shong bad ynda ki poi ha kawei ka jaka theh umphniang kali, ki shem ba hangta ruh ki don sa da kiwei pat ki kynhun lehnoh bad kumta ki la iaphet biang na katei ka jaka tad haduh ba kin da poi sha ka jaka kaba bun ki pulit bad ki bor pahara jong ka Israel bad ki sa lait-im na ka kti jong kitei ki lehnoh ha katei ka sngi.
Kumta, la ong ba ynda ki la poi ha ka jaka treikam ki shipai ka Israel, kin sa heh mynsiem ba kitei ki shipai ruh ki la ialam bad ai ka jingiada kaba biang tam naka bynta jongki bad ki la iarap ban pynpoi ia ki ruh sha ka jaka kaba shngaiñ tam bad kaba lait na kitei ki jingthombor jong ki lehnoh Hamas.
