Khliehriat, Risaw 16
Ka Chiehruphi SYWSC ka la buh jaka ïalade sha ka semi-final jong ka lympung ïalehkai First Division Football Tournament ba la pynïaid da ka East Jaiñtia Hills District Football Association (EJHDFA).
Kane ka nam jop ka la wan hadien ba ka pynliem noh ïa ka Wahiajer NYSSC lyngba ka tie-breaker da 4-2 kol ha ka jingïakhun quarter final kaba nyngkong kaba la long ha Artificial Turf kaba don ha Diengshyn-rum, Khliehriat ha ka lah sngi U Blei.
Haba phai sha kane ka jingïakhun ba la buh por ban pyndep, ka la long kaba shongshit bha ha kaba tang hapoh ka 4 minit ka Wahiajer NYSSC ka la ïoh ban pynkhih jar nyngkong eh lyngba u Yearly Mukhim bad ha ka minit kaba 9 ka la pynbud ïa ka kol ba ar lyngba u Monme Mynsong.
Ka Chiehruphi SYWSC hadien ka jingshah thep ar kol, ka la trei shitom da ka jingthmu ban pynïakhaid ïa ka jing-iakhun bad dei ha ka minit kaba 23 ka la ïoh ïa ka kabu ksiar ban thep kol lyngba ka penalty bad khlem da pynsepei u Sa-o-Bareh ula shut ïa ka bol bad ka la rung beit jlang shapoh kol. Kane ka kynhun ka la thep biang sa shi kol ha ka minit kaba 58 lyngba u Suting Syrti na ka bynta ban ïakhaid mar 2-2 kol.
Hadien ba kine ki ar liang mamla ki la ïakhaid, la rah noh ïa ka jingïa-lehkai sha ka jingïashut tie-breaker bad dei hangne ba ka Chiehruphi SYWSC ka la tam da 4-2 kol ïa ka Wahiajer.
Ka jingïakhun quarter final kaba ar kan long mynta ka sngi Ba-ar hapdeng ka Rymbai Synrang Shahkhian pyrshah ïa ka Ladrymbai B SC ha ka por 2 baje nohphai sngi.
