Chennai, Risaw:
Ki shipai duriaw ka Sri Lanka ki la kem ïa kumba 27 ngut ki nongtong dohkha jong ka ri India bad kurup ruh ïa san tylli ki lieng tong dohkha kiba shah kynnoh ba leit tam ïa ki bynta u pud u sam jong ki bynta ka um jong katei ka ri.
Kine ki nongtong dohkha ki dei ki nongshong shnong jong ka Ramanathapuram jong ka Tamil Nadu, kine ki la tong dohkha ha ki bynta jong ka um kaba hap hapoh ka ri Sri Lankan ha marjan jong ka Mannar hajan ka dewlynnong Delft bad Kachchativu ha Jaffna.
Ki nongtong dohkha jong ka Ramanathapuram ki la rai ban pynlong da ka jingïakhih kaba khlem buh por halor ka jingshah leh donbor jong ki 7,000 ngut ki nongtong dohkha. Ki nongtong dohkha ki la rai ban pynlong ïa ka jingïakhih ha ka sngi Balang na ka bynta ban dawa phah pyntreikam noh mardor ïa ki jingdawa jong ki.
