Ki la don bun bah ki jingjia ha kane ka jylla ha kaba ki hati khlaw ki la wan ban pynjulor ïa ki ïing ki sem bad ki jingthung jingtep nalor ba ki la shim ïa ki jingim briew bad kine baroh ki dei kiba pyni ïa ka jingïatyngkhuh hapdeng ki briew bad ki mrad. Na ka por sha ka por, kiba kum kine ki jingjia ki la paw pyrthei. U khun bynriew u donkam ban leit sha la bri ban kamai jakpoh katba ki mrad ruh ki donkam ban ïaid sharum shaneng ban wad bam namar ki jaka khlaw ki la nang duna bad syllen. Nalor kane ka jingjia, ka la don ruh ka jingwan ïaid ki hati na ki thaiñ Bangladesh sha khappud Assam bad Meghalaya.
Ki la don ruh ki jingjia kiba la paw ha kaba ki briew ki la pynïap ïa ki mrad kum ki skei, dngiem bad kumta ter ter. Namarkata, ka jingïatyngkhuh ka long na baroh ar liang. Kumno ngin leh ha kaba ïadei bad kine? Kam long kaba suk ban shu ong tang shi lain ba dei ban leh kumta kumta. Ka pyrthei ka la nang bun briew bad ki hap ban khih ban ksar na ka bynta ban ïoh ïa u khaw u kba katba ka jaka rieh tngen jong ki mrad ka la nang duna katba nang mih ki snem. Ki khlaw ki la nang syllen bad ka lynti ïaid jong ki mrad ka la nang stait haduh ba kim banse ban tur sa sha ki shnong ki thaw ban wad bam. Kita ki shnong lehse mynshuwa ki dei ki jaka sah jong ki mrad lane ki lynti ïaid jong ki hati. Hynrei namar ka jingnangïar ka jingdon ki briew, ki jaka khlaw ki la kylla madan ban shna ïing shna sem bad ban rep ban riang.
Hooid ki don ki aiñ kiba pynshitom ïa ki briew kiba donkti ban pynïap ïa ki mrad khamtam ïa kito ki mrad kiba la sdang ban duh jait na ka sla pyrthei. Hynrei ym don aiñ pat ban pynshitom ïa ki mrad kiba pynïap lane thombor ïa u khun bynriew! Ka rukom ba ju leh haduh mynta ka long ba ïa kito ki briew kiba shah thombor lane ki jaka kiba shah pynjulor ha ki mrad ka sorkar ka ju ai da ka pisa kum ka jingsiew ïa ka jinglutksan. Dei tang kane hi ka rukom kaba lah ban leh eiei haduh mynta na ka bynta kito ki lanot kiba shah thombor ha ki mrad.
Na ka por sha ka por, ka sorkar ka ju pynlong ïa ki jingïalang ban pynsngewthuh ïa ki briew halor ka jingdonkam ban ri ban sumar ïa ki mrad bad ban ym pynïap ïa ki bad lada ïoh ïa ki ruh dei ban ai sha ka tnat khlaw ba kan leh ïa kaba donkam. Ki don bun ki nongshong shnong kiba don ïa ka mynsiem isynei ïa kine ki jingthaw bad kim ju lehbeiñ satia ïa ki. Hynrei don ruh pat kiba pynïap bad bam doh lane kiba kamai jakpoh da kaba die im ïa ki lane hadien ba la dep ban pynïap. Ki don ki jait mrad kiba lah ban pynriewspah shisha ïa ki briew bad kita ki briew ki ju pynlut por bad sngi ban leit wad ïa kita ki mrad ban khaïi ïa ki. Ngi la ju ïohi ruh kumno ba ki briew ki leit prong ïa ka Kaziranga National Park kaba don ha jylla Assam ban ïoh pynïap ïa ki kyndad kiba don ha kane ka jaka khnang ba kin ïoh phut ïa ka bniat bad ban die. Ki la don bun bah ki kyndad kiba la shah pynïap na ka por sha ka por ha ki ‘riew thrang spah. Hynrei ha u snem ba la lah, ym shym la don ki briew kiba leit pynïap ïa ki kyndad ha kane ka Park bapawnam.
Na ka bynta ki briew kiba hap ban leit rep sha ki jaka ba kynjah lane sha ki bri, ka suk ban shu ong ïa ki ba kim dei ban pynïap ïa ki mrad. Kin leh kumno lada jia ba ma ki ki shah thombor lane ki jingthung jingtep ki shah pynjulor. Ban shu ïalap ka long kaba suk bha, hynrei na ka bynta kito kiba hap ban ïaid lyngba ki jingeh, kam dei ka kam kaba sting. Hynrei wat la katta ruh, ka tnat khlaw ka dei ban peit ba ki mrad ki dei ban ïoh ïa ki jaka shong jaka sah kiba biang bad ki ban pynlait ïa ki khun bynriew na ka jingshah thombor. Ha kane ka pyrthei, yn hap ban ïa im lang bad ym tang shiliang shiliang. Ka jingim jong ki mrad khamtam kito kiba la jan duh jait ka long kaba kordor, bad ka mynsiem briew ruh ka long kaba kordor bha.
