Shillong, Risaw 17
Ka lympung ïalehkai First Division Football Tournament ba ka pynïaid da ka Tyrsad Area Sports Association (TASA) ka la bteng biang ha ka sngi Ba-ar hadien ba la pynsangeh ha kine ki khyndiat sngi ba la dep.
Ha ka jingïakhun jong kane ka kyrdan ialehkai kaba la long ha madan Tyrsad, ka Mawlum Tyrsad SC ka la ïoh jingjop hadien ba ka lah ban pynliem ïa ka Phudbyrnei SC da 2-1 kol.
Ïa ki kol na ka Mawlum Tyrsad la thep da u Badon Khongsit ha ka minit kaba 36 bad Mebanker Khongsit (75), katba na ka liang ka Phudbyrnei la pynphai kylla shi kol lyngba u Yestarjone Sanglien (67).
Haba phai sha kawei pat ka jingïakhun kaba ar, ka Nongspung NAYSCSA ka la jop da 1-0 kol ïa ka Umkaber SC bad ïa kane la thep da u Welbanstone Syiemlieh ha ka minit kaba 84.
Kane ka lympung kan bteng biang ha ka sngi Saitjaiñ (21 tarik) ha kaba ka jingïakhun ha ka Third Division kan long hapdeng ka Mawteibah SC pyrshah ïa ka Rangkynsai SC ha ka por 12 baje mynsngi, kumjuh ha ka Second Division kan long hapdeng ka Madan Mawser SC ïa ka Wahlyngkien Ramklang ha ka por 1:30, katba ha ka First Division kan long hapdeng ka Wahlungkien Sunei SC ïa ka Rangshangkham SC ha ka por 3 baje janmiet.
