Khliehriat, Risaw 17
Ka Ladrymbai B SC ka la long ka kynhun ba ar kaba la buh jaka ïalade sha ka semi final ha ka lympung ïalehkai 1st Division Football Tournament ba la pynïaid da ka East Jaiñtia Hills District Football Association.
Kane ka la wan urlong hadien ba ka lah pynliem noh ïa ka Rymbai Synrang Shahkhain SC da 3-2 kol ha ka sngi Ba-ar ha madan Diengshynrum kaba ha Khliehriat.
Ha kane ka jingïakhun quarter final kaba ar, baroh ar kynhun ki la pyrshang ban ïakhun tyngeh naduh kaba sdang. Hadien shiteng kynta ka Ladrymbai ka la ïoh ban pynkhih jar nyngkong eh lyngba u Dasukwame Dkhar ha ka minit kaba 35. Hashwa ban kut ka jingïalehkai jong ka kylla step ka Rymbai Synrang ka la lah ban pynphai lyngba u Runald Dkhar ha ka minit kaba 43 na ka bynta ban ïakhaid mar shi kol.
Hadien katto katne por ba la bteng biang ïa ka jingïakhun jong ka kylla miet ka Ladrymbai ka la thep biang ïa ka kol kaba ar lyngba ka penalty ba la shut da u Andreas Lyngdoh ha ka minit kaba 49. Kane ka kynhun ka la pynbud biang ïa ka kol kaba lai lyngba ka penalty bad u Salo Siangshai haka minit kaba 68.
Hashwa ban wai ka Rymbai Synrang ka la ïoh ban thep shi kol lyngba u Ïaishah Bareh ha ka minit kaba 90+1 hashwa ba kan mad ïa ka jingshah rem.
Ka jingïakhun quarter final kaba lai kan long ha ka sngi Balang ha kaba ka Rangad SC kan ïakhun pyrshah ïa ka Khliehriat West ha ka por 2 baje janmiet.
