Shillong, Risaw 17
Ka ICC ka la pyntikna ba ka jingïalehkai kriket kan ïoh ban ïadon bynta ha ka Olympic Games ka ban long ha Los Angeles ha u snem 2028.
Ïa kane ka jingpynrung ïa ka jingïalehkai kriket la mynjur da ka International Olympic Committee (IOC) ha ka jingïalang jong ka IOC (141st IOC Session) kaba la long ha ka Lah Sngi U Blei ha Mumbai.
Ka jingpynrung ïa ka kriket ha ka Olympics ka dei ka sien kaba nyngkong eh naduh u 1900. Kane ka long ban ailad lang ïa kane ka jait jingïalehkai bad ruh ban khring ïa ki paidbah nongpeitkai.
La khmih lynti ba ka jingdon jong ki nongpeit ïa ka Olympic Games kan long palat ïa ki 3 billion lyngba ki TV bad ruh lyngba ki social media.
U Chairman ka ICC u Greg Barclay u la ong, “Ngi sngewkmen eh ban pynrung ïa ka jingïalehkai kriket ha ka LA28 Olympic Games hadien ba la pynthikna ha ka jingïalang jong ka IOC. Kane ka long ka kabu kaba biang eh ban plie lad ïa ki nongïalehkai ba kin pyni ïa ki sap ïalehkai jong ki ha ka LA28 Games.”
“Te kumta nga ai khublei ïa ka International Olympic Committee bad ka LA28 kiba la kyrshan lang ha ka ban pynrung ïa ka kriket ha ka Olympic. Kane ka long ka jingkmen kaba khraw namar la pynbna ha ka jingïalang ha Mumbai, ha ka por ba ka ICC Men’s Cricket World Cup ka dangïaid shaphrang hapoh kane ka ri.”
