Chandigarh, Risaw
U MLA barim jong ka seng Congress u Kulbir Singh Zira u la shahkem na ka ïingsah lade kaba don ha Ferozepur distrik ha ka step jong ka sngi Ba-ar halor ka jingshah kynnoh ba u la khanglad ïa uwei u heh sorkar ba un trei ïa ka kam jong u ha kine ki khyndiat sngi ba la leit, la ïathuh ki heh pulit. Kiba bun na ki nongkyrshan jong u ki la ïalum ha ka jaka treikam jong ki pulit bad ki la pyrta da ki kyntien kiba pyrshah ïa ka sorkar AAP hadien ka jingshahkem jong u.
U Zira, uba long u heh nongïalam jong ka seng Congress ha ka distrik, u la shahkem hadien ka jingujor jong u Block Development Panchayat Officer, uba la kynnoh ba ma u bad ki nongbud jong u ki la khanglad ïa u bad ïa kiwei pat ki nongtrei ba kin trei ïa ka kam jong ki ha ka por ba la don ka jingïakhih ha kine ki khyndiat sngi ba la leit.
U heh nongïalam jong ka seng Congress ha Punjab u Amrinder Singh Raja Warring u la pynrem jur ïa ka sorkar AAP halor ka jingkem ïa u Zira.
Ha ka jingpyllait khubor jong u ha kawei na ki lad phah khubor, u Warring u la ong ba ka la don ka jingmudui kaba la long pyrshah ïa u Zira namar ka jingïakhih jong u pyrshah ïa ki heh sorkar halor ka jingpynshisha ba kim shym la leh ne pyndep ïa ki kamram jong ki.
“Ka sorkar AAP ha Punjab ka la kwah ban set ïa ka sur jong ngi. Ngin ym shong jar jar bad ngin sa pynlong da ka jingïakhih kaba jur pyrshah halor kane ka jingleh donbor,” u la bynrap.
