Raipur, Risaw:
Uwei u lehnoh Naxalite u la shah pynïap ha ka jingïasiat kaba markylliang bad ki shipai ïada ri ha Bijapur distrik jong ka Chhattisgarh hynnin ka step, la ïathuh u heh pulit.
Kane ka jingïasiat ka la jia ha ka por kumba 6 baje mynstep ha kawei ka khlaw kaba don hajan ka shnong Bandepara kaba hap hapoh ka jaka treikam jong ki pulit ka Madded, haba ka kynhun ba la ïatreilang hapdeng ki shipai na kiba bun ki kynhun shipai ïada ri ki la don bynta ban leit khynra bad thwet ïa ki lehnoh, la ong u Inspector General of Police (Bastar Range) u Sundarraj P ha ka jingïakren bad ki nongthoh khubor. Ïa kane ka jingleit khynra lehnoh la don bynta da ki shipai kiba dei na ka kynhun District Reserve Guard, Bastar Fighter, jong baroh ar tylli ki kynhun jong ki pulit ka jylla, ka kynhun Special Task Force bad ka kynhun 170th battalion jong ka tnat Central Reserve Police Force’s (CRPF).
Kine ki la ïoh jingtip shaphang ka jingdon jong ki heh nongïalam jong ki lehnoh Naxal, kynthup u nongpynïaid jong ka kynhun Maoist ha ka thaiñ Madded u Nagesh, u Secretary jong ka u Buchanna, u dkhot jong ka Vishwanath ha ryngkat ki dkhot ka kynhun kiba don kumba 15-20 ngut ha ki bynta jong ki khlaw Koranjed bad Bandepara, la ïathuh u heh pulit. Hadien ba ka jingïasiat ka la sangeh, ki shipai ki la pynlong ïa ka jingleit jurip bniah ha kaba ki la lap ïa ka metïap jong u lehnoh Naxal bad ka suloi AK-47 na ka jaka ba la don ka jingïasiat, la ïathuh u heh pulit. Haduh ba la thoh ïa ka khubor ym pat lah ban tip ïa ka kyrteng jong une u lehnoh uba la shah siat ïap, la ong u heh pulit ha kaba u la bynrap shuh shuh da kaba ong ba ka jingleit jurip bniah bad ka jingleit khynra lehnoh ka dang ïai bteng ha kane ka thaiñ bad ha ki thaiñ ba marjan. Ka Bijapur ka la long ruh kawei napdeng ki 20 tylli ki Assembly konstitwensi ka ban sa pynlong ïa ka jingthep vote ha ka bynta kaba nyngkong jong ka ilekshon Chhattisgarh ha ka 7 tarik, Naiwieng.
