Shillong, Risaw 17
Ka PFR Football Academy ka la bteng ïa ka jingjop ba lai ha ka lympung ïalehkai SSA SRGT 3rd Division Football League 2023, hadien ba ka lah ban pynliem noh ïa ka Mawryngkneng SC da 2-0 kol ha ka sngi Ba-ar ha SSA Stadium, Polo.
Ïa kine ki kol la thep da u Adelbert Khongshun ha ka minit kaba 10 bad ïa kawei pat la pynbud da u Thymmaibor Mukhim ha ka minit kaba 71.
Lyngba kane ka jingjop ba lai ka PFR ka dang ïai bteng ban lamkhmat na ka Group-B ha kaba ka la kamai 10 point na ki saw sien ïakhun.
Ha ka jingïakhun jong ka Group-C, ka Mylliem Lum SC ka la jop da 4-1 kol ïa ka Lamparing SC bad u Eliastar Nongsiej u la khur ïa ka hat-trick.
Ha kane ka jingïakhun ka Mylliem Lum ka la lah ban ïalehkai bha naduh kaba sdang ha kaba u Lesterwell khriem u la ïoh pynkhih jar ha ka minit kaba 10 hashwa ba u Eliastar Nongsiej un thep lai kol (25, 39 & 64) na ka bynta ban khur ïa ka hat-trick. Hynrei ka Lumparing ka la lah ban pynphai kylla shi kol lyngba u Gillbert Nongneng (41).
Ha kawei pat ka jingïakhun jong kane kajuh hi ka group, ka Mawpat SC ka la khur ïa ka jingjop kaba nyngkong hadien ba ka la pynliem noh ïa ka Sanmer SC da 2-1 kol. Kane ka la wan lyngba u Batip Bamon uba la ïoh ban thep ar kol ha ka minit kaba 27 & 47. Hynrei ka Sanmer ka la lah ban pynphai kylla shi kol lyngba u Banshan Dhar (34).
Kane ka lympung kan bteng biang ha ka sngi Balang ha SSA Stadium ha kaba ka Nongumlong SC kan ïakhun pyrshah ïa ka Lumdiengjri SC (11AM), ka Lawmali Pyllun SC ïa ka Rynjah SC (1PM) bad ka Lapalang SC ïa ka Gorkha Association (3PM).
