Shillong, Risaw 17
Ka kynhun ïalehkai kriket ka Jylla ka la mad biang ïa ka jingshah rem da 9 wiket sa ha ka Mumbai ha ka lympung ïalehkai Syed Mushtaq Ali Trophy T20 tournament kaba la long ha ka sngi Ba-ar ha Jaipur.
Ha kane ka jingïakhun pyrshah ïa katei ka kynhun kaba don ïa ki rangïalehkai kiba la mihkhmat ïa ka ri bad kumjuh ha ka Indian Premier League, ka Meghalaya ka la kamai tang 65 run bad shah pynkhyllem 9 wiket ha ki 20 over, hynrei ka Mumbai ka la lah ban kynjoh sha ka thong bad shah pynkhyllem tang shi wiket ha ki 9.4 over.
Haba wan shimti ban tied nyngkong ka Meghalaya kam shym la lah ban shan hakhmat ki rangïalehkai ba kynsai ka Mumbai kiba kynthup ïa u Tushar Deshpande (3/8), uba dangshen u la ïoh ban ïalehkai na ka bynta ka Chennai Super Kings ha ka IPL.
Ka Meghalaya ka la lah ban kynjoh sha ki 27/7 hashwa ba u Anish Charak bad u Akash K Choudhury kin ïatied da 23 run, hynrei hadien u Charak (not out) u la tied 20 run katba u Choudhury u la ïoh 11 run.
Haba wan shimti ïa ka pali kaba ar, ka Mumbai ka la ïakhun tyngeh naduh kaba sdang lyngba u Yashasvi Jaiswal (21) bad uwei uba dangthymmai u Angkrish Raghuvanshi (32 not out). Hadien ka jingshah pynkhyllem noh u Jaiswal ha u rangïalehkai ka Meghalaya u Rajesh Bishnoi (1/20), la mih ban shimti noh da u Ajinkya Rahane (8 not out).
Watla kane ka kynhun ïalehkai ka Jylla ka la mad ïa ki ar tylli ki jingshah rem, hynrei ka la khmih lynti ban ïakhun tyngeh pyrshah ïa ka Mizoram ha ka sngi Palei.
